Үкімет су тасқынын алдын ала болжайтын батиметриялық зерттеулерге 576 млн теңге жұмсамақ.
«Бөлінген қаражат Су ресурстары және ирригация министрлігіне бағытталады. Қаржыландырудың негізгі бөлігі жабдықтар мен техникалық жарақтарды сатып алуға, сондай-ақ зерттеулер жүргізу жөніндегі қызметтерге арналатын болады. Атап айтқанда, қаражатты «Қазсушар» ШЖҚ РМК «Су метрология» филиалына тікелей еліміздің солтүстік, батыс және орталық өңірлерінің су тасқыны қаупі бар учаскелеріне батиметриялық түсірілім жүргізуге бағыттау жоспарланып отыр», делінген Үкіметтің хабарламасында.
Республикалық маңызы бар су қоймаларына батиметриялық зерттеу жүргізуді қоса алғанда, жұмыс 2025 жылы жалғасады.
Алынған деректер ҚР Цифрлық даму, инновациялар және аэроғарыш өнеркәсібі министрлігі мен «Қазақстан Ғарыш Сапары» ҰК» АҚ-ға су тасқынын болжау және модельдеу ақпараттық жүйесіне енгізу үшін берілмек.
Еске салсақ, мамырда вице-премьер Қанат Бозымбаевтың төрағалығымен өткен жиында Нидерландыдан келген ғалымдар су тасқынының алдын алуға қатысты жаңа шешімдер ұсынатыны айтылды. Арнайы IT-шешімдер енгізіліп, SKYMAX цифрлық карта-схемасы мен hydro.gov.kz платформасы іске қосылмақ.
Тиімді гидромониторинг үшін елімізде гидропосттар саны артады. Қолданыстағы 377 гидропостқа тағы жаңа 139 нысан қосылады. Олар су тасқыны қаупі бар аумақтар мен трансшекаралық өзендерде орнатылады.
Айтып өтелік, осыған дейін Қаржы министрлігі су тасқынынан зардап шеккен аймақтарда инфрақұрылымды қалпына келтіруге Үкімет резервінен 48,8 млрд теңге бөлінгенін мәлімдеді.
Қазірге дейін су тасқынынан зардап шеккен 7 463 отбасы жаңа қонысқа көшті. Сонымен қатар жақында 479 баспананың құрылысы аяқталады. 9 171 отбасыға жөндеу жұмысы үшін өтемақы төленді.
Сурет: freepik.com
