Алматыда Әл-Фараби даңғылында 3 адамның өліміне әкелген жол апатына күдікті азамат ұсталды. Бұл туралы Ішкі істер министрлігі мәлімдеді.
Оқиғадан кейін бірқатар лауазымды тұлғалар қызметінен босатылды. Атап айтқанда, Алматы қаласы полиция департаменті басшысының орынбасары, сондай-ақ әкімшілік полиция мен қоғамдық қауіпсіздік басқармаларының жетекшілері қызметтерінен кеткен.
Апаттан кейін Алматы полиция департаменті бастығының сыртқы қызметтер мен жол қауіпсіздігін қадағалайтын орынбасары, сондай-ақ әкімшілік полиция және қоғамдық қауіпсіздік басқармаларының басшылары атқаратын қызметтерінен босатылды деген ақпарат тарады.
Қайғылы оқиға 21 наурызға қараған түні Әл-Фараби мен Мендікұлов көшелерінің қиылысында болған. Жолда Mercedes және Zeekr көліктері соқтығысып, апат салдарынан үш адам қаза тапты. Mercedes көлігінің 29 жастағы жүргізушісі мен 20 және 22 жастағы екі жолаушысы оқиға орнында көз жұмды.
Zeekr көлігінің жүргізушісі жарақат алып, ауруханаға жеткізілген. Оған қатысты ҚР Қылмыстық кодексінің 345-бабының 4-бөлігі бойынша іс қозғалды. Полиция мәліметінше, ол апат кезінде мас күйде болған.
Жол апатынан кейін мемлекетке тиесілі қызметтік нөмірді заңсыз беру дерегі бойынша да қылмыстық іс қозғалды. Бұл істі ІІМ-нің ішкі қауіпсіздік департаменті тексеріп жатыр. Айта кетейік, ZEEKR автокөлігінің нөмірінде «QR» комбинациясы болған.
Желіде бұл апатқа көлік жарысы себеп болуы мүмкін деген болжам тарады. Полиция бұл ақпаратты растаған жоқ.
