Алматыда мектеп асханаларында тамақтану сапасын бақылауды күшейту үшін мониторингтік комиссия құрылады. Бұл жөнінде мектепте тамақтандыруды ұйымдастыру жөніндегі кеңес барысында Алматы әкімінің орынбасары Әсем Нүсіпова айтты.
Ыстық тамақтандыруды ұйымдастыру және санитарлық-эпидемиологиялық талаптарды сақтау бойынша мониторингтік топ құру туралы бұйрық бүгін бекітілмек.
Комиссия жұмысын қалалық мектептерде тамақтану сапасын бақылау үшін қала әкімінің өкімі бойынша құрылған ведомствоаралық сараптама тобы (ВСТ) орындайтын болады.
Сонымен қатар қалалық санитариялық-эпидемиологиялық бақылау департаментінің басшысы Қасымхан Алпысбайұлы жоспардан тыс тексерудің нәтижелерін айтты.
«Алматыда 328 мектеп бақылауға алынған. Oның ішінде 322-сінде ыстық тамақ ұйымдастырылған, қалғандарында буфет жұмыс істейді. 215 мемлекеттік мектептегі асханалар жеке кәсіпкерлерге жалға берілді. Бүгінгі таңда білім басқармасының мәліметінше, 54 мектептің асханасын жалға алушылар ауыстырылды. Айта кету керек, жалға алушылар объектінің санитариялық қағидалар талаптарына сәйкестігі туралы санитариялық-эпидемиологиялық қорытындыны уақтылы алуы тиіс», — деді ол.
Кеңес отырысында Қазақ тамақтану академиясының мектептегі тамақтану жөніндегі маманы Вероника Уливанова мектеп асханаларының өндірістік үй-жайларының санитарлық-гигиеналық нормаларға сәйкестігін бағалауды, тамақ өнімдеріне микробиологиялық зерттеулер жүргізу ұсынатынын айтты.
Айтып өтелік, бірнеше күн бұрын Маңғыстау облысының Мұнайлы ауданындағы мектепте 460-тан астам оқушы тамақтан уланып қалған еді.
96 бала ауруханаға жатқызылып, оның 43-і сауығып, үйлеріне оралған. Бірақ 53 оқушы әлі ем алып жатыр. Мамандардың айтуынша, қазір балалардың жағдайы тұрақты.
Оқушыларды емдеуге Астана медициналық университетінің инфекционистері мен гастроэнтерологтары, Денсаулық сақтау министрлігі Шұғыл медицина ұлттық үйлестіру орталығының мамандары тартылды.
Үкімет басшысы осы жағдайдан кейін бір ай ішінде республикадағы барлық мектеп тексерілетінін айтты.
Сурет: freepik.com