Батыс Қазақстан облысының Сырым ауданында жол жөндеуге бөлінген қаражатты жымқырған топқа қатысты іс сотқа жолданды. Мемлекетке келтірілген залал көлемі — 56 млн теңге. Бұл туралы қаржылық мониторинг агенттігі хабарлады.
2023 жылдың 27 наурызында Сырым аудандық тұрғын үй-коммуналдық шаруашылығы, жолаушылар көлігі және автомобиль жолдары бөлімі мен «Сапақ» өндірістік кооперативі арасында Жымпиты ауылындағы жолдарды жөндеуге 259 млн теңгенің келісімшарты жасалған.
Мемлекеттік сатып алу порталындағы дерекке сәйкес, құжатқа бөлім басшысы Тимур Айтқалиев пен кооператив өкілі Әлімжан Қарқынбаев қол қойған.
«Сапақ» ӨК ауылдың Ж.Молдағалиев, Б.Момышұлы, С.Жонысов және Е.Сатаев көшелеріндегі жолдарға күрделі жөндеу жүргізуге тиіс еді. Жұмыс барысында кооператив директоры Бауыржан Сапақбаев «Ак-Би» атты ЖШС басшысымен сөз байласып, бөлінген қаржыны иемдену жоспарын ойластырды, делінген ҚМА хабарламасында.
Тексеріс кезінде күдіктілер асфальт төселгені, жер қазылғаны немесе су құбырлары жүргізілгені туралы жалған дерек келтіріп отырған. Сайып келгенде аталған жұмыстың орындалмағаны анықталды.
Жалған актілер негізінде тапсырыс беруші бюджет қаражатын «Сапақ» өндірістік кооперативінің шотына аударып отырған. Кейін күдіктілер қаржыны өзара бөліскен.
Айта кетейік, бөлім басшысы лауазымына Тимур Айтқалиев 2021 жылы тағайындалған. Бұған дейін Шолақаңқаты ауылының әкімі болған. Аудан әкімдігінде қызмет атқарған.
«Бұған дейін сот үкімімен «Сырым аудандық тұрғын үй-коммуналдық шаруашылығы, жолаушылар көлігі және автомобиль жолдары бөлімі» мемлекеттік мекемесінің басшысы лауазымдық өкілеттіктерін теріс пайдаланғаны үшін кінәлі деп танылған», — деді ҚМА баспасөз қызметі.
Сот шешімімен іске қатысы бар адамдардың бірінің пәтері мемлекет есебіне өтті. Күдіктілерге тұрғылықты мекенжайынан кетуге тыйым салынған. Қылмыстық іс сотқа жолданды.
2019 жылдан бері Сырым ауданы БҚО-дағы ауқымды кен орны ҚПО компаниясының әлеуметтік көмегінен тыс қалып келеді.
фото: freepik.com
