Атырау облысының Құрманғазы ауданында ірі қара аузына жара шығып, мал арасында жұқпалы ауру тараған. Осы себептен 4 ауылда карантин жарияланды, деп хабарлады өңірлік ветеринария қызметі.
Қазір ауыл тұрғындарына ет сатуға уақытша тыйым салынған.
Зертханалық сынама нәтижесінде індеттің инфекциялық ринотрахеит екені анықталды. Ауру Дыңғызыл, Бөкейхан, Жапырақты және Еңбекшіл ауылдарында кездеседі.
Ринотрахеитке 3800 бас ірі қара шалдыққан. Мамандар антибиотик егіп, ем жүргізгеннен кейін 2800 мал сауығып шыққан.
Айта кетейік, ақпанның басында Атырау облысының Исатай ауданында көктайғақ кезінде жем-шөпке жете алмай 50-ден астам жылқы қырылды.
фото: istockphoto.com
