Атырау облысы Исатай ауданындағы Қамысқала ауылында көктайғақта жем-шөпке жете алмай, 50-ден астам жылқы қырылған. Бұл ақпаратты Исатай ауданының әкімдігі растады.
15 қаңтарда өңірде жаңбыр жауып, жер мұз қатқан, ал қаңтар айында мұздың үстінен қар жауған. Фермерлердің айтуынша, ашық далада жайылып жүрген мал індеттен емес, аштан қырылып жатыр. Әлсіреген жылқылар мұзда тайып құлаған.
Аудан әкімдігі жем-шөп тасымалдауға арнайы техника алдыру үшін кәсіпорындармен келіскенін мәлімдеді.
Айта кетейік, дәл сол Исатай ауданына қарасты Зинеден ауылында 65 ірі қарадан диарея мен инфекциялық ринотрахеит белгілері анықталған. Ауылдан малды әкету және әкелуге шектеу қойылды, эпизоотия ошағында дезинфекция жұмыстары жүргізіліп жатыр.
фото: «Ақ Жайық» газеті
