2025 жылы Қазақстанның Ғылым және жоғары білім министрлігі республикалық бюджеттен 268 674 899 теңгесін қазақ тілін үйретуге арналған компьютерлік ойын әзірлеуге жұмсаған.
Мемлекеттік сатып алулар порталындағы деректерге сәйкес, былтыр наурыз айында министрлік «тіл оқыту қызметтері» бойынша конкурс жариялаған.
№73531253-ОК1 лоты аясында 6 жастан 25 жасқа дейінгі балалар мен жастарға арналған, қазақ тілін ойын элементтері арқылы үйрететін компьютерлік ойын әзірлеу көзделген.
2025 жылдың 20 желтоқсанында Steam платформасында SteppeRider ойыны пайда болды.
Ойын жоспарында жылқы баптауға негізделген RPG, тарихи локациялар туралы (Отырар, Түркістан) айтылады. SteppeRider бастапқыда аталған талаптарға сәйкес келеді деу қиын, өйткені ойын нақты сюжеті жоқ шексіз раннерден тұрады.
Steam сайтында қолданушылар ойынға қатысты пікір қалдырғандар бар.
«Ойынды әзірлеген тарапты ренжіткім келмейді, бірақ ойын интерфейсі толық ағылшын тілінде болып, ал ойынның кей элементтері қазақ тілінде екені түсініксіз шешім деп білемін. «, — делінген хабарламада.
Ойынның техникалық сипаттамасы
Сайтта жоба егжей-тегжейлі сипатталған. Ойын танымдық сипатта әзірленуге тиіс еді, оның жалпы геймплей уақыты кемінде 12 сағатты құрайды деп көрсетілген.
Ойын элементтеріне интерактивті квест, логика мен есте сақтау қабілетін дамытуға арналған тапсырмалар, дыбысталуы мен субтитрі бар NPC-кейіпкерлер және ұлттық құндылықтарды интеграциялау кіреді.
«Шабандоз жылқысына ат қояды: оның күші мен төзімділігі тек қамқорлыққа ғана емес, ойыншының біліміне де байланысты болады.
Ойынның мақсаты – жылқыны баптау және тілді үйренуге қатысты тапсырмаларды орындау арқылы оның сипаттамаларын жақсартып, «Бәйге» жүлдегері атану.
Ойын процесі – жылқыны және оның сипаттамаларын таңдау: ойыншы жылқының атын, түсін (боз, құла, жирен), негізгі сипаттамаларын (жылдамдық, төзімділік, интеллект) таңдайды.
Жылқыға күтім жасау: жылқы мықты болуы үшін оны тамақтандыру керек (жем, шөп), күтім жасау керек (тазалау, суару). Әр әрекет қазақ тіліндегі сұрақпен немесе тапсырмамен сүйемелденіп отырады. Мысалы: жылқының сүтінен дайындалатын дәстүрлі сусын қалай аталады? «Ат» сөзіне дұрыс септік таңдаңыз», – делінген ойынның техникалық құжатында.
Жобаны EdTech саласында тәжірибелі және Unity немесе Unreal Engine лицензиялары бар мердігер орындауға тиіс. Ойынды PC және мобильді платформаларға бейімдеу жоспарланған.
Бастапқыда ойынға 241 838 392,85 теңге (ҚҚС-сыз) бөлінді.
Мердігер туралы не белгілі?
Министрліктің тендерін «United Kingdom» ЖШС-ы ұтып алды. Аталмыш компания 2014 жылы Алматы қаласында тіркелген. Иесі – Абрашкина Наталья Сергеевна.
Наталья Абрашкинаның атына 2023 жылы ашылған MEDIA PROJECT жеке кәсіпкерлігі де тіркелген.
