Қазақстанның ЕАЭО бойынша кедендік түсімнен алатын үлесі артуы мүмкін. Сенат кулуарында өткен брифингте Сауда және интеграция министрі Арман Шаққалиев осылай деді.
Соғыс басталғалы Ресейдің сыртқы экономикалық айналымы құлдырап кетті. Сонымен бірге қазіргі таңда логистикалық бағыттар мен сауда тізбектері де өзгерді. Экономикалық одақ ішінде кедендік бажды қайта қарайтын уақыт келді.
«Ресейдің үлесі 85%-дан асады. Соғыс басталды, санкциялар бар. Қазір сауда тізбегі өзгерді. Тауарлар көрші ел арқылы емес, өз еліміз арқылы келіп жатыр. Енді заңды негізде Қазақстанның кедендік түсімнен алатын үлесі артуы керек қой. Осыған орай Қазақстан үлесін арттыру көзделген бе?», — деп сұрады тілші.
Арман Шаққалиевтің айтуынша, Қазақстанның Еуразиялық экономикалық одақтың кедендік алымынан түсетін пайдасын арттыру мәселесі қарастырылып жатыр.
«Орынды сұрақ. Біз бұл мәселені талқылаймыз. Әріптестеріміз Ресеймен, Беларусьпен. Дұрыс айтасыз, ахуал өзгерді. Қазіргі уақытта баждардың пропорцияларын өзгерту керек. Оны өзгерту үшін біз жаңа әдістеме дайындап жатырмыз. Мәселе қараша айында қарастырылуы керек», — дейді ол.
Қоса кетсек, қазір экономикалық одаққа түсетін кедендік баждың 6,955%-ын Қазақстан, 1,900%-ын Қырғызстан, 1,220%-ын Армения, 4,860%-ын Беларусь, 85,065%-ын Ресей алып отыр.
Сурет: primeminister.kz
