2025 жылдың желтоқсанында Каспий Құбыр Консорциумы арқылы мұнай тасымалдауға қойылған шектеулерге байланысты ҚазМұнайГаз шамамен 300 мың тонна мұнайды өзге экспорттық бағыттарға қайта жөнелтті. Бұл туралы компанияның баспасөз қызметі хабарлады.
300 мың тонна шикізат Германия, Қытай, Баку-Тбилиси-Жейхан, сондай-ақ Новороссийск пен Усть-Луга порттары арқылы экспортталды. 2025 жылы Германиядағы Шведт қаласындағы мұнай өңдеу зауытына жеткізілген өнім көлемі 2,1 млн тоннаны құрады, ал 2026 жылы 2,5 млн тоннаға дейін ұлғаяды деп күтіліп отыр.
Ақтау порты арқылы Баку-Тбилиси-Жейхан бағытымен 1,3 млн тонна мұнай тасымалданған, 2026 жылы бұл көрсеткіш 1,6 млн тоннаға дейін артпақ.
Қытайға тауар тұрақты экспортталады. Өткен жылы бұл бағытта 1,1 млн тонна қазақстан мұнайы жеткізілген.
фото: ҚазМұнайГаз
