Бүгін Бас прокуратура мемлекеттік мүлікті басқару саласында жүргізген прокурорлық тексерудің нәтижесін жариялады.
Прокуратура бұрынғы Мәдениет министрі Арыстанбек Мұхамедиұлынан тағы үш компанияны қайтарып алмақшы. Министр заңсыз иеленген компаниялардың нарықтағы құны 3,5 млрд теңгені құрап отыр.
«2019 жылы бұрынғы Мәдениет министрі Мұхамедиұлымен үлестес жеке компанияның пайдасына 332 млн теңгеге Су және қолданбалы спорт түрлері бойынша республикалық жоғары спорт шеберлігі мектебі салынады. Алматы қаласында орналасқан кәсіпорын сатылғанға дейін 662 млн теңгеге бағаланған. Бірақ кешеннің нақты нарықтағы құны – 1,213 млрд теңге. Алматы қаласы прокуратурасының талап қоюы бойынша сот кәсіпорынды сатып алу-сату шартын жарамсыз деп таныды», — деп мәлімдеді Бас прокуратура.
Сонымен бірге Астана мен Алматыда прокурорлардың талап қоюы бойынша бұрынғы Мәдениет министрімен байланысты компанияларға 3,5 млрд теңгеден астам сомаға сатылған тағы үш объектіні мемлекет меншігіне қайтару туралы сот талқылаулары жүріп жатыр.
Айта өтсек, экс-министр Арыстанбек Мұхамедиұлы «Дипломат» қонақүйі және Ұлттық музейге қатысты қылмыстық іс бойынша кінәлі деп танылып, 11 жылға сотталған еді.
Ал 5 шілде күні Арыстанбек Мұхамедиұлы мен оның адвокатына қатысты сот үкімі аппеляциялық тәртіпте қаралып, өзгеріссіз қалғаны хабарланды.
Жалпы Бас прокуратура мемлекеттік мүлікті басқару және жекешелендіру саласында тексеру жүргізіп, 4,8 млрд теңгеден астам сомаға мүлікті мемлекет меншігіне қайтару туралы талап қойған. Бұл сома ішінде жоғарыда аталған іс те бар.
«Тексеру шеңберінде Ұлытау облысының прокуратурасы Қарағанды мемлекеттік мүлік департаменті басшыларының бірін сотқа берді. Ол мемлекетке 184 млн теңгеге залал келтіруге әкеп соққан мемлекеттік меншік объектісін иеліктен шығару кезінде немқұрайлылық танытқаны үшін айыпталып отыр. Тексеру қорытындысымен Бас прокуратураның ұсынуы бойынша жүйелі кемшіліктер мен олқылықтар үшін мемлекеттік мүлік және жекешелендіру комитетінің 35 лауазымды адамы, оның ішінде өңірлік департаменттердің бірінші басшылары жазаланды», — деп хабарлады Бас прокуратураның баспасөз қызметінен.
Сурет: primeminister.kz