Қазақстанда медицина қызметкерлеріне қатысты зорлық-зомбылық үшін жауапкершілік күшейтілді. Бұл туралы Денсаулық сақтау министрлігінің баспасөз қызметі хабарлады.
Медицина қызметкерлерінің, сондай-ақ жедел жәрдем бригадалары жүргізушілерінің өміріне, денсаулығына және қауіпсіздігіне қол сұғу үшін қылмыстық жауапкершілікті көздейтін жаңа бап енгізілді.
Күш қолданамын деп қорқытқандарға 200-ден 500 айлық есептік көрсеткішке дейін айыппұл, түзеу немесе қоғамдық жұмыстар, не екі жылға дейін бас бостандығын шектеу немесе айыру жазасы қарастырылған.
Денсаулыққа орташа қауіп келтіргені үшін 500-ден 1000 АЕК-ке дейін айыппұл, 600 сағатқа дейін қоғамдық жұмыстар немесе үш жылға дейін бас бостандығынан айыру жазасы көзделген.
Ал өмір мен денсаулыққа зардап тигізгені үшін бес жылдан он жылға дейін, ауырлататын жағдайларда жеті жылдан он екі жылға дейін бас бостандығынан айыру жазасы тағайындалады.
Айта кетейік, 2019 жылдан бері медицина қызметкерлеріне жасалған 280-нен астам шабуыл тіркелген.
2025 жылдың тамызында Түркістанда ер адам фельдшерді соққыға жықты. Жүкті әйеліне медициналық көмек шақырған ер адам фельдшердан жұбайын қызғанған.
фото: freepik.com
