Бюджет қаражатын ұрлады деп айыпталған «ҚазАвтоЖол» ҰК» АҚ-ның бұрынғы төрағасының ісі сотқа өтті.
«Есіл өзені арқылы көпір салумен «Жақсы–Есіл–Бузулук» автожолын күрделі жөндеуге бөлінген мемлекет қаражатын жымқырды деген күдікпен «ҚазАвтоЖол» ҰК» АҚ бұрынғы төрағасы мен бас мердігерге қатысты тергеу аяқталды», — деп хабарлады Бас көлік прокуратурасы.
Тергеуде анықталғандай, «ҚазАвтоЖолдың» басшылығы мердігерге негізсіз артықшылық білдіріп, 200 млн теңге көлемінде аванс бере отырып, заңсыз шарт жасасқан.
Бас көлік прокуратурасы істі Астана қаласының сотына жолдады.
Еске салсақ, сәуір айында «ҚазАвтоЖолдың» бұрынғы басшысы Асқар Мұратұлы ұсталған еді. Ол басқарма төрағасы қызметін 2021-2022 жылдар аралығында атқарған.
Қоса кетейік, көктемде «ҚазАвтоЖол» ҰК» АҚ «Астана–Петропавл» автожолына жауапты филиалы 605 тасымалдаушыдан негізсіз ақша ұстап келгенін хабарланды. Тасымалдаушылардың құқы бұзылғанын Көкшетау қаласының көлік прокуратурасы анықтаған. Тексеріс нәтижесінде 605 кәсіпкердің 3,5 млн теңгесі негізсіз алынғаны белгілі болды.
Сондай-ақ, «ҚазАвтоЖол» қызметін тұтынатын 138 мың адам үш жылда жалпы сомасы 50 млн теңге қарыз болған. Оны қайтару мәселесіне оператор ден қоймаған.
Сурет: freepik.com
