Екі жылға созылған еңбек дауында Мөлдір Ғапиз жеңіске жетті. Ол Ырғыз ауданы сотында жеңіске жеткенімен, Ақтөбе облысының сотында жеңіліс тапқан. Одан кейін жоғарғы сотта құқығын қорғады. Адвокатқа қаражат таппаған кіші қызметкер сот отырыстарына қорғаушының көмегінсіз қатысты. Жоғарғы сот Ырғыз мектеп гимназиясынан Мөлдір Ғапизге 1 700 000 теңге өндіріп беру жөнінде шешім шығарды. Бұл жөнінде tilshinews.kz жазды.
Ақтөбе облысындағы Ырғыз мектеп-гимназиясының кіші қызметкері болған Мөлдір Ғапиздің еңбек дауына қатысты күресі шамамен екі жылға созылып, жоғарғы сотқа дейін жетті. Оның айтуынша, оқиға мектеп басшылығының оны жұмыстан заңсыз шығаруынан басталған.
Екі жыл бұрын қараша айында Ырғыз ауданына іссапармен барған Ақтөбе облысының әкімі Асхат Шахаров Ырғыз мектеп гимназиясында тұрғындарды қабылдайды. Білім ордасының кіші қызметкері Мөлдір Ғапиз мектептегі тазалық жұмыстарына қатысты мәселелерді көтереді: дәретханада су жоқ, еден жуатын құралдарды қызметкерлер өз қаржысына сатып алады, тағы басқа да жайттар белгілі болды.
Араға санаулы апта салып, мектеп басшылығы Мөлдірді екі күн жұмыста болмады деген желеумен қызметінен босату жөнінде бұйрық шығарады.
Алдымен қызметтен босату туралы бұйрық, одан кейін үш айлық сынақ мерзімімен «жаңа қызметкер» ретінде қайта қабылдау туралы құжат — барлығы еңбек кітапшасына тіркелген.
Еңбек кітапшасындағы бұл белгі оның кәсіби беделіне нұқсан келтіріп, алдағы жұмысқа орналасу мүмкіндігіне тікелей әсер етуі мүмкін еді. Сол себепті Мөлдір еңбек құқығын қалпына келтіру үшін жоғарғы сотқа жүгінуге бел буды.
Сот адвокатсыз өтті
Мөлдір аудандық сотқа да, облыстық та сотқа да адвокатсыз қатысқан. Себебі адвокат қызметінің құны — 500 мыңнан 1 миллион теңгеге дейін бағаланады, ал оның ондай қаражат ұсынуына мүмкіндігі болмады. Заң саласынан алыс, тәжірибесіз адамның өзі сот залында мемлекеттік мекемеге қарсы тұруы оған оңайға түспеген.
Алғашқы отырыстарда қорқыныш басым болғанын, жанына жақын адамдардың өзі «Адвокатсыз қалай соттасасың?» деп күмәнмен қарағанын айтады. Соған қарамастан, ол күресті жалғастырды.
«Бұл жағдай менің айналамдағы адамдарды сүзгіден өткізді»
Мөлдір үшін бұл кезең құқығын қорғауға арналған күрес қана емес, өмірлік сабақ болды. Жақын араласқан әріптестерден көрген реакциясы жүрегіне ауыр тигенін айтады. Бірақ бүгінде ол бұл кезеңді артта қалдырды.
Оның оқиғасы — жүйенің осал тұстарын, қызметкердің қорғансыздығын, бірақ сонымен қатар жеке адамның табандылығы мен әділетке деген сенімін көрсететін мысал.
Мектеп басшылығы журналистерді де сотқа берді
Қызметінен босаған кезде Мөлдір Ғапиз араша сұрап, ақтөбелік журналист, «Тілші» жобаларының авторы Асқар Ақтілеуге де жолығады. Бұл шамамен 2023 жылдың қараша айы болатын. Кіші қызметкердің мәселесін көтерген журналисті «жалған ақпарат таратты» деген желеумен мектеп директоры Гүлжайнар Нұрманова сотқа береді. Бұл іс ұзаққа созылмады. 2024 жылдың ақпанында сот журналисті ақтап алды.
«Көмек сұрап біраз жерге хабарластым, тек Асқар Ақтілеу мұңыма құлақ асып, мәселен әрі қарай көтере бастады. Алайда өзіне сот алдында жауап беруге тура келді. Абырой болғанда, сот журналиске тағылған айыпты жоққа шығарып, іс Асқардың жеңісімен аяқталды», — дейді Мөлдір Ғапиз.
