Әскерде қаза тапқан 18 жастағы Өмірбек Есбергеновтың анасы ұлының өліміне қатысты істің әділ тергелуін талап етті. Бұл туралы «Ақ Жайық» ақпарат порталы жазды.
Өмірбек Есбергенов 2024 жылдың сәуірінде Орал қаласындағы Ұлттық ұлан «Батыс» өңірлік қолбасшылығына қарасты №5517 әскери бөлімде қаза тапқан. Ресми құжаттарда оның өліміне жүректің тоқтап қалуы себеп болды делінген.
Әскери міндетін өтеп жүрген кезде сарбаз бірнеше рет анасымен байланысқа шығып, ақша аударуды сұраған. Тергеу барысында қаражат өзге сарбаздың шотына аударылғаны анықталды. Айна Есбергенованың сөзінше, бұл ақшаны кейін командирлер мен сержанттар иемденген, алайда тергеу бұл жайтқа тиісті деңгейде назар аудармаған.
Анасы мәйітханадан ұлының денесінен соққы іздерін көргенін, басы мен денесінде жарақат болғанын айтты.
Өмірбек Есбергенов бірнеше түн бойы нарядта тұрған, кейін шаршап ұйықтап қалған сарбазды командир соққыға жыққан. Айна Есбергенова ұлы жарақат алғаннан кейін оған медициналық көмек көрсетілмегенін, ал кінәлілердің әлі де бостандықта жүргенін айтады.
Естеріңізге сала кетейік, қараша айында Астанада ұлдары әскерде қаза болған аналар министрліктер үйінің алдында митинг өткізді.
фото: azh.kz
