Оралдағы су және кәріз жүйелері испандық Aqualia S.A. компаниясының басқаруына беру жөнінде келіссөздер жүргізілуде. Бұл туралы Өнеркәсіп және құрылыс министрлігі хабарлады.
Тараптар Оралдың су инфрақұрылымын Aqualia басқаруына беру мүмкіндігін және Батыс Қазақстан облысы әкімдігімен қол қойылған меморандум аясындағы бастамаларды жалғастыруды талқылады.
Кәріз станциясының аумағы кімге тиесілі?
Заңгер, қоғам белсендісі Бауыржан Заки қараша айында стратегиялық нысан саналатын №22 кәріз сорғы станциясының жер көлемі заңсыз түрде азайтылғанын анықтады.
Орал қаласындағы Ю.Гагарин мен Ш.Айталиев көшелерінің қиылысында орналасқан «Батыс су арнасы» ЖШС-на тиесілі жер телімінің аумағы толық көрсетілмеген. Белсенді атап көрсеткен map.gov4c.kz порталындағы 081300271607 кадастр нөмірімен тіркелген жер көлемі 777 шаршы метр деп белгіленген, ал осы тұста орналасқан «Орал сүт зауыты» ЖШС-ының жер телімі 1996 шаршы метрді құрайды.
Кәріз сорғы станциясы қаланың су беру және су бұру жүйесінде стратегиялық нысан болғандықтан, оның жерін азайтуға немесе өзге мақсат үшін қолдануға тыйым салынған.
Су резервуарлары неге пайдаланылмай тұр?
«Батыс су арнасы» компаниясы 2022 жылы 329,5 млн теңгеге сатып алған су резервуарлары әлі күнге дейін пайдаланылмай бос жатыр, деп хабарлады заңгер Бауыржан Заки.
Google картасындағы деректерге сәйкес С.Датұлы көшесіндегі «Батыс су арнасы» ғимаратының ауласында 43 дана су резервуары бар. Мемлекеттік сатып алу порталындағы құжаттар бойынша 2022 жылдың 5 тамызында Орал қалалық ТҮКШ бөлімі мен Өскемен қаласында тіркелген «АЮ» жеке кәсіпкері арасында 329,5 млн теңгеге көлденең су резервуарларын сатып алу туралы шарт жасалған. Әр резервуардың құны, шамамен, 7,6 млн теңге. Төлем 2022 жылдың 4 қарашасында жүргізілген.
Тұрғындарды ауыз сумен қамтамасыз ету үшін алынған бұл жабдықтар үш жыл бойы қолданылмаған. Заңгер Бауыржан Закидің айтуынша, тауарды сатып алып, оны пайдаланбау «Мемлекеттік сатып алу туралы» және «Мемлекеттік аудит және қаржылық бақылау туралы» заңдарға қайшы келеді.
«Батыс су арнасы» ЖШС-ның бас директоры Әнуар Аркенов мекемені 2021 жылдың шілдесінен бері басқарып келеді, сондықтан заңсыз фаткілер үшін жауап беруге тиіс дейді белсенділер. Бауыржан Заки осы мәселе жөнінде БҚО прокуратурасы мен ҰҚК-нің Сыбайлас жемқорлыққа қарсы департаментіне шағым жолданғанын мәлімдеді.
Қала бойынша инфрақұрылым желілері әбден ескірген. Жалпы ұзындығы 483,5 км су құбырының 60%-ы, 375 км кәріз желісінің 61,3%-ы тозған. Осы себептен 2024 жылы техникалық апат салдарынан өңірде 710 030 текше метр су ысырап болған.
Оқыңыз: Орал тұрғындары көлікті әлі де ауыз сумен жуады: қала техникалық су мәселесін қалай шеше алады?
Айта кетейік, таяуда БҚО-ны электр энергиясымен қамтамасыз ететін «Батыс Қазақстан аймақтық электр желілік компаниясының» қарыздары жайлы белгілі болды. Ал электр желілерінің тозу деңгейі облыс бойынша 78%-86%-ды құрайды.
Оқыңыз: БҚО-да электр желісі 86% тозған: компания тағы да тариф көтеруді ұсынады
фото: istockphoto.com
