2025 жылдың 1 желтоқсанына дейін Батыс Қазақстан облысында 108 мыңнан астам киік ауланған. Бұл туралы облыс әкімі Нариман Төреғалиев баспасөз отырысында хабарлады.
«Киік мәселесі біраз уақыт бойы, әсіресе шаруа қожалықтары мен тұрғындарды әбігерге салғаны белгілі. Бұрын “мәселе шешілмей жатыр” деген әңгіме жиі айтылатын. Бүгінгі күні бұл бағытта жағдай реттелді. Үкіметтің тиісті қаулысымен киік санын реттеу туралы шешім қабылданды.
Биыл біз реттеу жұмыстарына кірістік. Жақында ғана, желтоқсан айына дейінгі кезең ішінде, қаулыға сәйкес 108 мыңдай киік ауланды. Аулаудың екі әдісі қолданылды: ату және тор арқылы ұстау», — деді облыс әкімі.
Қазақстан бойынша киік популяциясының ең көп үлесі БҚО-ға тиесілі. Өңірде 2,3 млн киік бар. Жергілікті фермерлердің айтуынша, киіктер егінді басып, өнім алуға кедергі жасайды.
Агроөнеркәсіп иелерінің шағымына байланысты биыл 3 шілдеде аңшылар тобы киік аулауды бастады. Киік етін союға облыстағы жеті кәсіпорын жауапты.
Кәсіпорындар киік етін сатылымға шығаруды қолға алды. Қазір киік етінің келісін 1600 теңгеден табуға болады.
фото: freepik.com
