Олигархтардан мемлекет меншігіне қайтарылған 1 трлн теңгеге жуық қаражат «Бәйтерек» Ұлттық холдингін капитализациялауға бағытталады. Бұл туралы вице-премьер, ұлттық экономика министрі Серік Жұманғарин Сенат отырысында мәлімдеді.
Жұманғарин қазір қосымша мемлекеттік кепілдіктер көлемін арттыру көзделгенін атап өтті. Бұл ең алдымен автомобиль және теміржолдарды салу мен реконструкциялау сияқты инфрақұрылымдық жобаларды қамтиды.
«Аталған тетіктер арқылы жүзеге асатын жобалар өңірлерде орындалып, елдің жиынтық даму бюджетінің өсуіне ықпал етеді», — деді ол.
2025 жылдың бірінші жартыжылдығында негізгі капиталға салынған әрбір бесінші инвестиция мемлекеттік бюджеттен бөлінген. Экономист Нұрсұлтан Ерболатұлы бұл туралы пікір білдірді.
«Ұлттық экономика министрі Серік Жұманғарин «Бәйтерек» холдингі арқылы экономиканы 8 трлн теңгеге кредиттейміз деді. Бұл былтырғы жылмен салыстырғанда 2 есеге көп.
Елімізде банк секторының инвестициялауға құйған үлесі аз. Банктерге экономиканы кредиттеуге қарағанда халыққа несие берген тиімді болып кетті. Себебі бұл саланың тәуекелі төмен, ал табысы жоғары. Жаңа салықтық өзгертулерде жеке тұлғаларды несиелеуден түскен табысқа 25% салық салатын болса, кәсіпкерлерге берілген несиеден 20% салық ұстанатын болды. Үкімет осылайша банк секторын экономиканы кредиттеуге ынталандырып отыр», — деді сарапшы.
фото: freepik.com
