Оралда Зашаған кенті әкімдігінің бірнеше қызметкеріне өз міндеттеріне салғырт қарады деген күдікпен қылмыстық іс қозғалды. Бұл туралы жергілікті Jaiyq Press басылымы хабарлады.
Орал қаласының прокуроры Мейірхан Ізімовтің айтуынша, кент әкімдігінің немқұрайлылығы аумақтағы қылмыс көрсеткішінің артуына әкеліп отыр. Зашаған тұрғындары біраз уақыт бойы балалардың қауіпсіздігі үшін №20 мектепке жақын орман алқабындағы ағаштарды отауды өтініп келген. Қыркүйек айында дәл осы жерде 10 жасар қыз бала зорланған.
«Зашаған кентінің әкімдігі тұрғындардың өтінішіне құлақ түрмеген, бұның нәтижесінде қылмыс болды», — деді прокурор.
Орман алқабынан арақ бөтелкелері мен қолданылған инелер табылған. Қазір Зашаған кенті әкімдігінің лауазымды тұлғаларына қатысты Қылмыстық кодекстің 371-бабы бойынша тергеу жүріп жатыр.
Облыс прокуроры Нұрбек Ұласбекұлының айтуынша, бұл аймақта балаларының қауіпсіздігіне алаңдаулы ата-аналар 4 жыл бойы әкімдікке шағымданып келген. Атқарушы билік бұл өтініштер бойынша жұмыс жүргізбеген.
фото: istockphoto.com
