Батыс Қазақстан облысында Чапай-Жаңақала-Сайқын бағытындағы тас жолда болған ауыр жол апатының себептерін анықтау және зардап шеккендерге көмек көрсетуді ұйымдастыру үшін арнайы комиссия құрылды. Бұл туралы облыс әкімдігінің баспасөз қызметі хабарлады.
Жұмыс тобы оқиғаның мән-жайын толық әрі объективті анықтау үшін тергеу жүргізеді, зардап шеккендерге медициналық және психологиялық көмек көрсетуге ықпал етеді. Комиссия құрамына облыс прокуроры, полиция департаменті мен төтенше жағдай департаментінің басшылары, салалық басқармалар өкілдері және Жаңақала ауданының әкімі енді.
17 қарашада трассада бір-біріне қарама-қарсы жүрген Toyota Camry мен Volkswagen Sharan көліктері соқтығысты. Соның салдарынан көліктердің бірі өртеніп, оқиға орнында сегіз адам қаза тапты. Төрт адам Ақжайық аудандық ауруханасына жеткізілді.
Денсаулық сақтау басқармасының мәліметі бойынша зардап шеккендердің екеуі – балалар. Олар Ақжайық аудандық ауруханасынан облыстық көпбейінді балалар ауруханасына жеткізілді. 2012 жылы туған ұл мен 2024 жылы туған қыз – жабық бас-ми жарақатын алған, миы шайқалған. Екеуінің жағдайы орташа ауыр деңгейде.
Көлікте болған 2002 жылғы әйел адамның ішкі ағзасына ота жасалды, шынтағы мен саны жарақттанды. Оның жағдайын дәрігерлер тұрақты деп бағалады. Ал 2001 жылғы ер адам белінің төменгі бөлігі жарақаттанған. Амбулаторлық ем қабылдаған соң облыстық балалар ауруханасындағы баласының қасына жатқызылды.
Қаза тапқандар Жаңақала ауданының Мұқыр, Жаңақала, Қызылоба, Мәштексай және Қаратөбе ауданының Егіндікөл ауылдарының тұрғындары екені анықталды. Аталған факт бойынша полиция қылмыстық іс қозғады.
