15 қарашада мәжіліс «Құқық бұзушылық профилактикасы туралы» заң жобасын мақұлдады. Құжат аясында азаматтардың конституциялық құқығына қайшы контентті орналастырғанға және таратқандарға әкімшілік жаза қолданылады. Бұл туралы Мәжілістің баспасөз қызметі хабарлады.
«Онлайн-платформалар және онлайн-жарнама туралы» заңның 14-бабының 1-тармағына сәйкес, заңсыз контентке Қазақстан Республикасының конституциялық құрылысын күшпен өзгертуге немесе тұтастығын бұзуға шақыратын, мемлекеттің қауіпсіздігіне нұқсан келтіретін, соғысқа үндейтін, зорлық-зомбылық пен қатыгездікті, суицидті, есірткі мен психотроптық заттарды дәріптейтін материалдар жатады. Сондай-ақ сепаратизмді, алаяқтықты насихаттайтын немесе ұлтаралық және дінаралық келісімді бұзуға ықпал ететін ақпарат та бұл тізімге кіреді.
Құқыққа қайшы материалды анықтау кезінде алдымен ішкі істер органдары немесе өзге уәкілетті ведомстволар сараптама жүргізеді. Сарапшы материалдың мазмұны заң бұзушылық белгілеріне сәйкес келетін-келмейтінін бағалайды. Алайда түпкілікті шешімді тек сот шығара алады, яғни әкімшілік жауапкершілік тек сот шешімімен белгіленеді.
