2025 жылдың алғашқы жартысында елдегі 470 ломбард 32,1 млрд теңге таза пайда тапқан. Бұл былтырғы көрсеткіштен 35%-ға көп, деп хабарлады Ranking.kz.
2025 жылдың алғашқы жартыжылдығында Қазақстанда 470 ломбард тіркелген. Олардың 2025 жылдың басынан бастап тапқан жиынтық пайдасы 32 млрд теңгені құрап, өткен жылмен салыстырғанда 35%-ға өсті. 2024 жылдан бері елде 35 ломбард жабылған, ал 2023 жылы олардың саны 538-ге жетсе де, жалпы табысы 14 млрд теңге болған.
Биыл маусым айының соңында елдегі ломбардтардың жиынтық кредиттік портфелі шамамен 322 млрд теңгеге жетті. Бұл өткен жылдың сәйкес кезеңімен салыстырғанда 40%-ға көп.
Қазір ломбардтардағы мерзімі 90 күннен асқан несиелердің үлесі 2,3%-ды құрайды. Аталмыш көрсеткіш микроқаржы ұйымдарындағы деңгейден үш есе төмен (6,8%). Бір жыл бұрын мерзімі өткен несиелердің үлесі 3,8% болған.
44 млрд теңгені құрайтын ең ірі кредиттік портфель «М-Ломбард» компаниясына тиесілі. бұл өткен жылмен салыстырғанда бір жарым есе көп. Одан кейін «МК-Ломбард» (36 млрд тг) және «Сейф-Ломбард» (32 млрд тг) тұр. Сондай-ақ, «мк-Золото Ломбард» (32 млрд тг), «Астра-Ломбард» (23 млрд тг), «Деньги населению» (23 млрд тг) және Birinshi Lombard (22 млрд тг) компаниялары да несие портфелінің көлемі бойынша көш бастап тұр. Аталған жеті ломбард елдегі барлық 470 ұйымның несие портфелінің шамамен екіден үш бөлігін иеленген.
фото: freepik.com
