Шымкентте визуалды контентке негізделген интернет журналы таныстырылды. Kiiz space өнер кеңістігінде өткен іс-шараға өңір журналистері, медиа сарапшылар, бизнес өкілдері мен медиажобалардың кейіпкерлері қатысты.
Beine.Pro – Шымкент пен Түркістан өңірінің тыныс-тіршілігін фото, видео және иллюстрация арқылы таныстыратын дербес интернет журнал.
Жобаның визуал контент продюсері, фотожурналист Әйгерім Бегімбет журналдың пайда болу тарихы туралы айтты.
«2019 жылдан бері Internews Kazakhstan ұйымының қолдауымен бірнеше медиажоба жүзеге асырдық. Енді сол тәжірибені дамытып, аймақ өмірін фото және видеоконтент арқылы көрсетуге бағытталған сапалы репортаждар жасаймыз», – деді ол.
Beine.Pro әйел мен бала, ауыл өмірі, экология, білім, денсаулық, урбанистика және жасанды интеллект тақырыптарына басымдық береді.
Журналда фоторепортаж, видеорепортаж, сторителлинг және дата жобалар жарияланады. Қазір жобаның YouTube-тағы арнасындағы қаралым саны 300 мыңнан, ал TikTok пен Instagram желілеріндегі видеолардың қаралымы 200 мыңнан асқан.
Жобаның мультимедиа журналисі әрі үйлестірушісі Жанерке Хумар Beine.Pro-ға тән форматтың ерекшелігін атап өтті.
«Beine.Pro – уақыт ағымына байланбайтын контент өндіретін медиа. Фото мен иллюстрациядан бастап, видеорепортаж және рилс форматтарына дейін дамыдық. Бұл – толыққанды мультимедиалық журналға айналудың алғышарты болды», – деді ол.
Beine.Pro интернет журналының негізгі құндылығы үшеу: Жаңашыл. Жауапкершілік. Адалдық. Яғни Beine.Pro — жауапкершілік пен адалдық қағидаттарын ұстанып, жаңашыл контент өндіретін медиа.
Бас редактор Жәнібек Нұрыштың айтуынша, команда жергілікті медианарықты дамытуға, ал жасанды интеллект пен заманауи құралдарды пайдалану арқылы шынайы контент өндіруге ұмтылады.
«Біз барлық медиажобаны бір ортаға жинап, тұрақты жұмыс істейтін редакция құрдық. Жаңа форматта контент жасап, монетизацияның түрлі әдісін енгізуді жоспарлап отырмыз», – деді ол.
Журналдың логотипін графикалық дизайнер Шыңғыс Әбдіразақ әзірлеген. Ол «бейне» ұғымының проекциясы ретінде өмірдің өзін қаз-қалпында көрсетуді бейнелейтін идеяны ұсынды.
Тұсаукесер барысында «Тіршілік» және «Түркістан әйелдері» фотокөрмесі көрсетіліп, медиасарапшылар Молдияр Ергебеков, Бақыт Аманжолқызы, Думан Смақов, Жұлдыз Әбділда, Асхат Еркімбай және Асқар Ақтілеу қатысқан панельдік пікірталас өтті. Сарапшылар медиаэтика, интеллектуалды медиа, фактчекинг және жасанды интеллект дәуіріндегі журналистика туралы ойларын ортаға салды.
Қазір журналдың beinepro.kz ресми сайты мен YouTube, Instagram, TikTok, Facebook, LinkedIn желілерінде парақшалары, сондай-ақ WhatsApp және Telegram арналары бар.
