Марқұм Болат Назарбаевтың ұлы Нұрбол Назарбаев 57,9 млрд теңге берешегі үшін банкроттық туралы өтініш берген. Қазір оның мүлкі тәркіленіп, есепшоттары мен шетелге шығуына шектеу қойылған.
Бұған дейін сот Нұрбол Назарбаевтың 57 млрд теңге көлеміндегі активтерін мемлекетке қайтару туралы шешім шығарды. Мәжіліс депутаттары да оның мүлкі мен компанияларына түгендеу жүргізіп, заңсыз алынған активтерді мемлекет меншігіне қайтаруды талап еткен болатын.
Нұрбол Назарбаевқа Prime Capital және оның еншілес компаниялары (Real, Re Plaza, Re Ushkonyr, Re Talgar, Re Karasay, Re Alakol), Qaz-Ak-Kus құс фабрикасы, Prime Capital Invest, Алматы ауыр машина жасау зауыты, PLS-TM, PLS инвестициялық-құрылыс компаниясы және Қарасай ауданындағы «Бахар-А» салтанат үйі тиесілі.
Енді ол бес жыл бойы несие ала алмайды, жеке кәсіпкер ретінде тіркеле алмайды және ірі мәмілелер мен кірістері туралы уәкілетті органды хабардар етіп отыруға тиіс.
Нұрбол Назарбаев рейдерлік әрекеттерге байланысты да бірнеше рет айыпталды. Ол 2019 жылы кәсіпкер Қуат Ерментаевтың Porus компаниясындағы үлесін күшпен иемденуге тырысқан.
