Кәсіпкер Қайрат Боранбаев шартты түрде мерзімінен бұрын босатылу туралы өтінішін кері қайтарып алды. Бұл туралы Алматы қаласының Бостандық аудандық сотының баспасөз қызметі хабарлады.
Боранбаевтың өтініші 2 қазанда Бостандық аудандық қылмыстық сотында онлайн форматта қаралды.
«Сот отырысы барысында сотталушы өз өтінішін қайтарып алды. Осыған байланысты сот оның шартты түрде босату туралы сауалын қараусыз қалдырды», – деді қалалық соттың баспасөз хатшысы.
ОҚЫҢЫЗ: 2012 жылы Қайрат Борантаев алматылық «Қайрат» футбол клубының төрағасы атанды. 2025 жылы «Қайрат» өз тарихында алғаш рет чемпиондар лигасының негізгі кезеңіне өтті. Бұл жеңіс Қайрат Боранбаев үшін де ерекше мәнге ие. «Реалмен» айқас Боранбаевтың беделін қалпына келтіре ме?
Боранбаев ісі
Кәсіпкер 2023 жылдың 31 наурызда «қылмыс жасауға көмектесу» (ҚК 28-бап, 5-бөлік), «аса ірі көлемде өзгенің мүлкін жымқыру» (ҚК 189-бап, 4-бөлік, 2-тармақ) және «қылмыстық жолмен табылған кірісті заңдастыру» (ҚК 218-бап, 3-бөлік, 3-тармақ) баптары бойынша айыпталған.
Сот үкімімен Боранбаев 8 жылға абақтыға қамалды. 2023 жылдың маусым айында іс соттың екінші инстанциясына жіберілді. Қыркүйек айында апелляциялық сот Боранбаевты кінәлі деп танып, 6 жылға бас бостандығынан айырды.
2023 жылдың 6 қарашасында ІІМ Қылмыстық-атқару жүйесі комитеті Қайрат Боранбаевтың босатылғанын хабарлады. Оның жаза мерзімінің өтелмеген бөлігі бас бостандығын шектеумен алмастырылған.
Тергеу кезінде Боранбаев мемлекетке жалпы құны 124 миллиард теңге болатын мүлік пен ондаған бизнес-активін өткізген еді.
фото: qmonitor.kz
