Енді АҚШ дүкендерінің сөресінен Қазақстанда өндірілген ұнды табуға болады. Алғашқы 50 тонна бидай ұны Нью-Йоркке жеткізіліп, Eurasian Legacy атымен сатылымға шықты.
Отандық өнім қазір Amazon және Walmart онлайн платформаларында қолжетімді. Ұнның қаптамасында «Product of Kazakhstan» деген жазу да бар.
Бағасы мен сұраныс
Amazon платформасында қазақ ұнының 1,36 келілік қаптамасы 14,5 доллардан сатылып жатыр (7900 теңге). Жергілікті наубайханалар мен кафелерге жеткізілім отандық тауарға тапсырыс беруді бастап кеткен.
Бұдан бөлек, QazTrade өкілдері ұнды Costco, Whole Foods және Trader Joe’s секілді АҚШ-тың ең ірі бөлшек сауда желілеріне шығару бойынша келіссөз жүргізіп жатыр.
«Экспорт көлемін айына 100 тоннадан асыру жоспарланып отыр»
Бұл – АҚШ-та ұлттық тауарды сатудың жаңа стратегиясы аясында жүзеге асқан алғашқы ірі жоба. Сауда министрлігінің мәліметінше, алдағы уақытта экспорт көлемін айына 100 тоннадан асыру жоспарланып отыр.
Жыл сайын 2 млн тоннаға жуық қазақстандық ұн Орталық Азия елдері, Ауғанстан, Қытай және Ресейге экспортталады.
QazTrade бас директоры Айтмұхаммед Алдажаровтың айтуынша, қазақстандық компаниялар АҚШ-қа тек ұн ғана емес, басқа да азық-түлік өнімдерін таныстырумен айналысып жатыр. Олардың қатарында қарақұмық, гранола, талқан, шоколад және какао бар. Нью-Йорк, Чикаго және Вашингтондағы серіктестер бұл өнімдердің сапасын бағалап үлгерген.
2025 жылы астық өндірушілер мен экспорттаушыларға 409,6 мың тонна бидай тасымалдағаны үшін 9,1 млрд теңге төленген.
АҚШ нарығына шығу неліктен маңызды?
Америкалық нарық – тұтынушылар арасында сапасы дәлелденген өнімдерді ғана таңдайтын бәсекелестігі өте жоғары орта. Қазақстандық ұнның аталмыш нарыққа шығуы – елдің агроөнеркәсіп кешені үшін жаңа кезең. Бұл тек экспорттық әлеуеттің артқанын ғана емес, сонымен қатар Қазақстанның халықаралық деңгейде сенімді жеткізуші ретіндегі имиджін қалыптастырады.
фото: freepik.com
