Сыртқы істер министрінің орынбасары Әлібек Бақаев Дохаға жасалған шабуылдан қаза тапқандар мен зардап шеккендердің арасында Қазақстан азаматтары жоқ екенін хабарлады.
Елшілікке қазіргі уақытта ел азаматтарынан көмек сұрап, ешкім хабарласпаған.
Әлібек Бақаевтың айтуынша, Қатарда шамамен 1,5 мың қазақстандық жүр. Қазір оның ішінде 516-сы консулдық есепте тұр. Олармен тұрақты байланыс орнатылған.
9 қыркүйек күні Израиль әскері Дохада бірнеше нысанға әуе шабуылын жасады.
«Әл-Жазира» телекомпаниясының мәліметінше, Израиль «Хамастың» Газадағы соғысты тоқтату жөніндегі келіссөз жүргізушілерін нысанаға алған. Шабуылдан кейін Дохада бірнеше рет жарылыс болды.
Қазақстан президенті Қасым-Жомарт Тоқаев Қатар астанасы Дохада Израиль билігі жасаған әскери акцияны айыптады.
«Қандай мақсатты көздесе де, мұндай әрекетке жол беруге болмайды. Бұл Қатар мемлекетінің егемендік құқығын бұзады және халықаралық құқық қағидаттарына қайшы келеді», — делінді Ақорда ақпаратында.
Фото: Kazinform
