«Қазатомөнеркәсіп» ҰАК» АҚ-тың негізгі кәсіпорны – геологиялық жұмыстар мен технологиялық бұрғылауға жауапты «Волковгеология» АҚ-ның бюджет қаражатын жымқыру фактісі бойынша тергеу аяқталды. Бұл жөнінде ҚМА хабарлады.
Екі жыл бойы компанияның бұрынғы басқарма төрағасы Д.Н. Молдаши орындалған жұмыс бойынша жалған актілер рәсімделетін схема ұйымдастырған.
«Аталған құжаттарда «Казбурмаш СК» ЖШС-нен жеткізілмеген қосалқы бөлшектер қабылданғаны туралы жалған мәліметтер көрсетілген. Осы жалған актілер негізінде контрагентке 86 млн теңгеден астам сома аударылған. Кейін бұл қаражат заңсыз иемделген», — делінген ҚМА ақпаратында.
Тергеу барысында күдіктілер келтірілген материалдық шығынды толық өтеді. Қылмыстық іс сот қарауына жолданды.
Бұған дейін осы іс аясында «Волковгеология» АҚ филиалының директоры А.М. Борашев, сондай-ақ «Казбурмаш СК» ЖШС басшысы Е.С. Алипбаев пен бухгалтер Г.Ж. Токатаева үш жылдан жеті жылға дейін бас бостандығынан айырылған.
«Қазатомөнеркәсіп» ҰАК» АҚ – уран, сирек металдар, атом электр станцияларына арналған ядролық отын импорты мен экспорты бойынша Қазақстан Республикасының ұлттық операторы. 2009 жылдан бері Қазақстан табиғи уран өндіру бойынша әлемдік көшбасшы.
«Қазатомөнеркәсіптің» акциялары «Астана» халықаралық қаржы орталығының биржасында және Лондон қор биржасында 2018 жылдың қарашасынан бастап сатылымда.
Фото: Kazatomprom.kz
