Жыл басталғалы электросамокат жүргізушілерінің кінәсінен 93 жол-көлік оқиғасы тіркелді. Салдарынан 101 адам жарақат алып, бір адам қаза тапты. Бұл жөнінде Data Hub аналитика арнасы жазды.
Жол апаттарының негізгі себебінің бірі самокат жүргізушілерінің маневр жасау ережелерін сақтамауы (оқиғалардың 28%-ы) болып отыр.
Сонымен қатар апатқа кінәлі самокат жүргізушілерінің үштен біріне жуығы жаяу жүргіншіге соқтығысқан. Ал төрттен бірінде бетпе-бет түйісу болған.
Велосипедшілердің кінәсінен болған ауыр апаттардың саны самокатпен жасалатын апаттардан асып түсетінін атап өткен жөн. Биыл қаңтар-тамыз айларында велосипедшілердің қатысуымен 198 оқиға тіркелді. Бірақ мұндай оқиғалардың салдарының ауыр жағдайға әкелуі сирек кездескен. Ал елде сегіз айда мопед жүргізушілерінің кінәсінен 689 оқиға тіркеліп отыр.
Қазақстанда мопед, электросамокат, скутер секілді көлік түрлерінің қатысуымен болатын апаттар жиіледі. Былтыр мопедтерді тіркеу мен көлік жылдамдығын бақылауға арналған жаңа заң қарастырылып, мақұлданды. Елде қазірге дейін тиісті заңға сәйкес тіркелген мопедтер саны 48 мыңнан асты.
Енді мемлекет қоғамда қызу талқынып жатқан электросамокат мәселесіне назар аударып отыр. Қазір бұл саланы реттейтін заңға түзетулер әзірленген.
2024 жылы Қазақстанда мопед жүргізушілерінің (оның ішінде велосипед, скутер бар) кесірінен – 1 260, самокат жүргізушілерінің кінәсінен 90 жол-көлік оқиғасы тіркелді. Бұдан барлығы 1 748 адам зардап шекті. Оның ішінде 654-і – кәмелетке толмаған балалар. 1 636 адам жарақат алды, оның 631-і – бала. Аталған оқиғалар салдарынан 112 адам, оның ішінде 23 бала қаза тапты.
БҚО-да мопед және самокат иелерінің жол жүру ережесін бұзуы салдарынан бес жылда 84 жол-көлік оқиғасы тіркелді. Осы уақыт ішінде бес адам қаза тауып, 95 адам жарақат алған. Өңірде 929 мопед тіркелген. Биыл мопедтерді тіркеуден өтуге міндеттейтін заң қабылдағаннан кейін ереже бұзған 178 мопед жүргізушісі анықталып, 300 әкімшілік хаттама толтырылды. Сонымен қатар 168 мопед айып тұрағына қойылды.
Фото: Freepik.com
