Депутат Дәулет Тұрлыхановтың ұлы Нұрасыл Болат соттан жазасын жеңілдетуді сұрады. Бүгін Алатау қалалық соты оның жазасын жеңілдетуден бас тартты.
Нұрасыл Болаттың ісін жеңілдету туралы жазасын өтеп жатқан мекеме сұраған. Прокуратура да бұл өтінішті қолдады. Жәбірленуші адвокаттар Олег Чернов пен оның жұбайы Анна да бұл ұсынысқа қарсы болмаған. Бірақ осының бәріне қарамастан сот Нұрасыл Болаттың жазасын жеңілдетуден бас тартты.
Айта кетелік, былтыр 22 қазанда Алматы қаласы Медеу ауданы №2 аудандық сотының қаулысымен сотталған Нұрасыл Болатқа қатысты 1 жыл 5 ай 10 күн бас бостандығын шектеу жазасының өтелмеген бөлігі орташа қауіпсіздік деңгейіндегі қылмыстық-атқару жүйесі мекемесінде бас бостандығынан айыру жазасына ауыстырылды. Бұл пробациялық бақылау талаптарының бірнеше рет бұзылуына байланысты қабылданды.
Осыған дейін сотталған адамға алдын ала міндеттері түсіндіріліп, ескертілген. Ол 2024 жылы 14 тамызда түнгі сағат 03:00-де қоғамдық орында болып, соттың қойған шектеулерін бұзған. 2024 жылы 11 қазанда кешкі уақытта мейрамханаға барған және 12 қазанда түнгі ойын-сауық мекемесінде болған.
Еске салсақ, 2023 жылы 11 ақпанда Нұрасыл Болат Алматыдағы түнгі клубтың жанында ерлі-зайыпты Анна мен Олег Черновтарды ұрып-соққан еді.
Фото: Freepik.com
