Қазіргі уақытта Батыс Қазақстан, Атырау және Маңғыстау облыстарынан шыққан бірде-бір шенеунік министр портфелін ұстамаған. Қазақстан үкіметінде басшылық қызметті 26 адам атқарады. NewTimes.kz министрлердің шыққан тегі туралы қызық дерек ұсынды.
Саясаткерлердің басым бөлігі Алматы қаласы мен Алматы облысынан шыққан. Оның ішінде: Олжас Бектенов – премьер-министр, Қанат Бозымбаев пен Мұрат Нұртілеу – вице-премьер және сыртқы істер министрі, сондай-ақ Ермек Көшербаев – вице-премьер.
Батыс Қазақстаннан шыққан жалғыз саясаткер – Серік Жұманғарин. Ол Ақтөбе өңірінің тумасы. Қазір ұлттық экономиканы басқарады, сондай-ақ премьер-министрдің орынбасары қызметінде.
Үкімет мүшелерінің шамамен 40%-ы – еліміздің оңтүстік өңірлерінің тумалары. Бір қызығы, Түркістан облысынан шыққан бірде-бір министр жоқ. Қызылордалық Ғалымжан Қойшыбаев – вице-премьер (үкімет аппаратының басшысы), Ақмарал Әлназарова – денсаулық сақтау министрі, ал Ғани Бейсембаев – оқу-ағарту министрі.
Жамбыл облысынан: Нұржан Нұржігітов – су ресурстары және ирригация министрі, Нұрлан Сауранбаев – көлік министрі.
Ал Роман Скляр болса, Павлодар облысында туған.
26 министрдің ішінде тек үшеуі ғана – әйел. Олар – мәдениет және ақпарат министрі Аида Балаева, денсаулық сақтау министрі Ақмарал Әлназарова мен еңбек және халықты әлеуметтік қорғау министрі Светлана Жақыпова.
Министрлердің ішінде ең жасы үлкені – 1961 жылы туған экология министрі Ерлан Нысанбаев.
Ал ең жас шенеуніктер: ТЖМ басшысы Шыңғыс Әрінов пен цифрлық даму министрі Жаслан Мәдиев (1983 жылы туған), сондай-ақ туризм және спорт министрі Ербол Мырзабосынов (1984 жылы туған).
Бір жылда туған министрлер қатарында Серік Жұманғарин, Қанат Бозымбаев, Ғани Бейсембаев және Дәурен Қосанов бар. Барлығы 1969 жылы дүниеге келген.
Фото: Primeminister.kz
