Жамбыл облысы полиция департаменті бастығының орынбасары заңсыз әрекет жасады деген күдікпен ұсталды. Бұл туралы ҚР ІІМ ішкі қауіпсіздік департаменті хабарлады.
Полиция департаменті бастығының орынбасары уақытша ұстау изоляторына қамалды. Қылмыстық іс бойынша сотқа дейінгі тергеу жүріп жатыр.
БАҚ пен әлеуметтік желілерде күдіктінің аты-жөні Жайдарбек Құттыбаев болуы мүмкін деген ақпарат тарады.
2024 жылдың қыркүйегінде Жамбыл облысы полиция департаментінде басшылық құрамның тең жартысы жұмыстан босатылды. Бұған олардың қол астындағы қызметкерлеріне күш көрсетуі себеп болды. Атап айтқанда, департамент бастығы Арманбек Баймурзин, оның орынбасарлары Нұржан Рахметуллаев, Қанат Сматов, Бауыржан Үдергенов, Құрмет Мәжікенов және жеке қауіпсіздікті басқару бөлімінің басшысы Алмас Қожашев қызметінен кетті.
Посмотреть эту публикацию в Instagram
Арманбек Баймурзин қызметкерлерін балағаттаған видеосымен есте қалды. Ал Құрмет Мәжікеновтің қатардағы полиция қызметкерінің жағынан тартқан сәті түскен бейнежазба әлеуметтік желіде тараған.
Посмотреть эту публикацию в Instagram
Жамбыл облысы полиция департаментіндегі құқық бұзушылықтарды тексеру үшін бірден Астанадан комиссия жіберілді. Нәтижесінде басшылық құрамның орны ауысты.
Осы оқиғадан кейін облыстық полиция департаментінің бастығы болып Мақсат Қанапияев тағайындалса, Жайдарбек Құттыбаев оның орынбасарлары қызметіне келді. Ол бұған дейін әкімшілік полиция департаментін басқарған.
Құттыбаевтың бір полиция департаменті басшысы болып отырғанына бір жыл уақыт болмаған. Ведомство күдіктінің нақты қандай қылмысқа барғанын ашып айтпады. Әзірге Қылмыстық кодекстің қай бабы бойынша іс қозғалғаны және істің мән-жайы туралы ресми ақпарат жоқ.
фото: polisia.kz
