Барланған уран қорының шамамен 14%-ы Қазақстанда шоғырланған. Еліміз аталмыш кеннің көлемі бойынша әлемде екінші орында тұр. Алайда әлемдік атом энергиясы агенттігінің зерттеуінше, Қазақстандағы уран мөлшері тек 2040 жылға дейін жетуі мүмкін.
“Қазір елімізде ядролық отын циклін дамыту жоспарланып отыр. Біз өндіріске арналған уран ұнтақтары мен таблеткаларын жасап келе жатырмыз, ал 2021 жылдан бастап атом электр станцияларындағы реакторларға дайын ядролық отын саналатын жылу бөлетін жинақтарды шығара бастадық”, – деді ҚР Атом энергетикасы агенттегі басшысының орынбасары Әсет Махамбетов.
2036 жылы іске қосылатын алғашқы қазақстандық АЭС үшін жергілікті уран кені қолданылады. Сол кезде елде отын жеткілікті деңгейде бола ма, бұл сұрақ басы ашық күйінде қалып отыр.
2025 жылдың алғашқы жартыжылдығының қорытындысы бойынша «Қазатомөнеркәсіп» ұлттық компаниясының операциялық пайдасы 12%-ға артып, шамамен 254 млрд теңгені құрады. Бұл 2024 жылдың алғашқы жартыжылдығымен салыстырғанда 6%-ға төмен. Биыл компанияның таза пайда көрсеткіші 571,7 млрд теңгеден 263,2 млрд теңгеге дейін қысқарып, 54%-ға азайды.
«Қазатомөнеркәсіп» – уран, сирек металдар және атом электр станцияларына арналған ядролық отын импорты және экспортымен айналысады. Биыл компанияның операциялық қаржы ағыны 65%-ға өсіп, 532,9 млрд теңгеге жеткен.
Сонымен қатар уран өндірісі 13%-ға ұлғайып, жалпы мөлшері 12 242 тоннаны құрады. Дегенмен өнімді өткізу көлемі 2%-ға азайып, 7 625 тоннаға дейін төмендеді. Ал дайын өнім қоры 9%-ға артып, 6 677 тоннаға жетті.
2025 жылы Қазақстанда жылына 2 мың тонна уран өндіретін «КАТКО» бірлескен кәсіпорнының жаңа зауыты іске қосылды.
Сондай-ақ қазір TQZ зауыты мен Буденов кен орнында жылына 6 мың тонна уран өндіретін қайта өңдеу кешенінің құрылысы жалғасып жатыр.
Alatau City Invest онлайн-брокерінің индикаторларды талдауында уранның нарықтағы бағасы жоғары екені көрсетілген.
“Өткен аптада уран бағасы 1,7%-ға көтеріліп, 74,3 АҚШ долларына жетті. Баға 70 доллар деңгейіндегі қолдау шегіне жетпей-ақ өсуін жалғастырды”, — деп хабарлады брокерлік компания.
фото: gov.kz
