2025 жылдың маусым айында Қазақстандық «Еуразиялық банк» пен оның бас компаниясы «Еуразиялық қаржы компаниясының» (ЕҚК) иесі Патох Шодиев сотқа шағымданды. Ол 2 маусым күні өткізілген акционерлер отырысының шешімін заңсыз деп санауды талап етіп отыр.
23 маусымда марқұм Әліжан Ибрагимовтың ұлы Шухрат Ибрагимов та құзырла органдарға шағымданды. Әліжан Ибрагимов – Патох Шодиевтің ЕҚК бойынша серіктесі, оған компанияның 20,7% акциясы тиесілі еді.
Оның ұлы Шухрат Ибрагимов өз арызында керісінше, акционерлер жиналысының шешімін заңды деп тануды сұрады.
Акционерлер отырысының шешімі жайлы нақты ақпарат ашық дереккөздерде көрсетілмеген.
Бұл Шодиев пен Ибрагимов арасындағы алғашқы дау емес. Бұған дейін ЕҚК-ні Freedom Holding Corp.-қа (Тимур Турловтың компаниясы) сату төңірегінде жанжал өршіді. Шодиев пен марқұм Александр Машкевич компанияны сатқысы келсе, Ибрагимов бұған қарсы еді. Сот бұл істе Ибрагимовтың тарапын жақтады.
Банк төңірегіндегі кикілжіңдер
- 2015 жылы Еуразиялық банктің қызметкері Татьяна Бурнакина Ресейдің newslab.ru басылымына берген сұхбатында банк ішінде қарапайым алаяқтық жүйе бар екенін бөлісті. Оның сөзін ресми түрде ешкім жоққа шығармады. Банк Бурнакинаны қызметтен босатумен шектелді.
- Патох Шодиевтің інісі Орифджан Шадиевтің да басы дауға қалды. Ұлттық банк пен кредиторлардан қашқан ол «Еуразиялық банктен» 2,7 млрд теңге несие алып, қарызын қайтармаған. Кейін банк оның және бұрынғы жұбайының бірнеше пәтері мен үйін кепілге алып, сот арқылы мүлкін тәркілеген. Артынша бұл мәміле заңсыз деп танылып, дау бірнеше жылға созылды.
- 2013 жылы Еуразиялық банктің қызметкері 22 жасар Галина Корнелюк 9 VIP клиенттің депозит шотынан $2 млн ұрлағаны жария болды. Ол ұрланған ақшаны артынша казино мен құмар ойындарға жұмсаған. Сот Корнелюкті 8 жылға бас бостандығынан айырды.
Патох Шодиевтің қызы Муниса 2024 жылдың қазан айында «Еуразиялық банк» директорлар кеңесіне кіріп, небәрі үш айдан кейін, желтоқсанда орнын босатты. Бұл шешімнің нақты себебі айтылмайды. Алайда ол бұл лауазымды «Еуразиялық банкті» Freedom Holding-қа сату туралы шешім талқыланған кеңесте дауыс беру үшін уақытша иеленуі мүмкін.
Муниса Шодиеваның аты халықаралық бизнес жобаларда да дауға қалды. Ол Лондонда құрылған Vault Couture компаниясын өзінің жеке стартабы ретінде таныстырғанымен, көптеген дереккөздерде бұл жобаның негізін қалаушы америкалық кәсіпкер Рут Баринштейн екені көрсетілген.
ЕҚК төңірегіндегі аталмыш дау Қазақстанның қаржы нарығындағы ірі ойыншылардың ықпалын кері қарастыруға әкелуі мүмкін.
Шодиев пен Ибрагимов арасындағы алғашқы сот отырысы 26 тамызда өтеді. Патох Шодиев сот кезінде ЕҚК-дан 1 млн теңге көлемінде моральді өтемақы алуды көздеп отырғанын жеткізді.
коллаж: Sarapshy.info
