Қазақстанда “PSY-тәуекел” атты суицидтік мінез-құлыққа бейімділікті ерте анықтауға бағытталған жаңа скрининг жүйесі енгізіле бастады. Бұл туралы Қорғаныс министрлігі хабарлады.
Әскери психологтардың бұл әдістемесі 2025 жылдың көктемгі шақыру науқаны кезінде сынақтан сәтті өткен. Тексеріс нәтижесінде 470-тен астам азаматтан қауіпті мінез-құлық белгілері байқалды. Олардың жартысы әскери қызметтен босатылса, қалған жартысы қосымша медициналық тексеріске жіберілген.
Жаңа жүйе бірнеше кезеңнен тұрады: бастапқы скрининг, тереңдетілген психологиялық бағалау және қажет болған жағдайда психиатриялық сараптама.
Қорғаныс министрлігінің психологиялық және әскери-әлеуметтік жұмыс басқармасының бастығы, подполковник Арман Қалышевтің айтуынша, бұл бастама Үкімет тапсырмасына сәйкес жүзеге асырылып отыр.
“Біз тек тұрақсыз психологиялық күйдегі азаматтарды анықтап қана қоймай, әскери бөлімдердегі жеке құрамды да ықтимал қауіптен қорғауды көздейміз. Бұл – әскердегі моральдық-психологиялық ахуал мен жауынгерлердің өміріне тікелей әсер ететін маңызды қадам”, – деді ол.
Жүйе алдағы уақытта елдің барлық өңірінде кезең-кезеңімен енгізіледі.
фото: gov.kz
