Астана қаласында баласының еміне деп жиналған 1,3 миллиард теңгеге пәтер, көлік және жер телімін алған ерлі-зайыптыға қатысты қылмыстық іс қозғалды. Бұл туралы қаржылық мониторинг агенттігінің Астана қаласы бойынша департаменті хабарлады.
Тергеу нәтижесінде ерлі-зайыпты әлеуметтік желілерде баласының емі үшін қаражат жинауға бағытталған кең көлемді жарнама жүргізгені анықталды. Instagram мен Facebook-тағы әсерлі жазбалар мен бейнероликтер көпшілікке әсер етіп, бұның нәтижесінде олар халықтан 1,3 млрд теңгеден астам қаржы жинаған.
Жиналған қаражаттың тек 6,4 млн теңгесі ғана баланың еміне жұмсалған. Қалған сомаға елордадан 3 пәтер, жер телімі, 5 автокөлік сатып алынып, бір бөлігі құмар ойындарға кеткен.
Айыпталушылар Түркияда 84 миллион теңге тұратын ота жасатпақ болған. Тергеу барысында ешқандай операция болмағаны, әлеужеліге салынған ұшақтағы бейнелер мен “ота сәтті өтті” деген жазба жалған екені белгілі болды.
Қылмыстық жолмен алынған мүлікті жасыру үшін жер телімі басқа адамның атына рәсімделгенімен, бұл әрекет те әшкереленді.
Қазіргі таңда күдіктілер үйқамақта, ал заңсыз алынған мүліктің бәріне сот тыйым салды.
