Қытайдан Қазақстанға заңсыз жолмен тауар жеткізіп, жалған шот-фактуралар жасаған компания басшылары сотталды. Бұл туралы Қаржылық мониторинг агенттігі хабарлады.
«Group of the Companies TDA» ЖШС-ы 2014 жылы ашылған. Компанияны Әнипа Назарбаева мен Али Клышпаев басқарған.
Әнипа Назарбаева — Нұрсұлтан Назарбаевтың туған қарындасы. Бұрын оның иелігінде Үшқоңыр су шаруашылығы колледжі мен Алматыдағы «Кенжехан» базары болған.
Агенттік хабарламасында ЖШС елге 100-ден астам тауар контейнерін заңсыз кіргізгені айтылады. Сонымен қатар, компания өз бақылауындағы 10 серіктестік арқылы жалған құжат жасатып, құн салығы мен кедендік төлемдерден жалтарып келген.
Тергеу кезінде жалпы құны 1,3 млрд теңге болатын тауарға шектеу қойылды. Компания мемлекетке 10 млрд теңге көлемінде залал келтірген, яғни корпоративті табыс салығын төлемеген.
Сот үкімімен айыпталушылар 1 жыл 4 айдан 4 жыл 6 айға дейін бас бостандығынан айырылды. Аталған іс бойынша тағы бір адамға халықаралық іздеу жарияланды.
