18 шілде күні кешкі уақытта Астанадағы «Абырой» тұрғын үй кешенінің құрылыс алаңында мұнаралы кран құлап, соның салдарынан мердігер компанияның бір қызметкері көз жұмды. Бұл туралы BI Group компаниясының баспасөз қызметі хабарлады.
Компания кран техникалық тұрғыда жарамды болғанын айтты. Жұмыс күні басталар алдында тиісті тексеру жүргізілген. Қайғылы жағдай орын алғанда краншы жұмысын аяқтап жатқан.
«Кранның аударылуына қатты жел себеп болды. Өкінішке қарай, оқиға салдарынан бір адам қаза тапты. Қаза тапқан азаматтың туыстарына қайғырып көңіл айтамыз», – делінген BI Group хабарламасында.
Компания сондай-ақ дауылды ескерту туралы ақпарат төтенше жағдайдан кейін ғана түскенін айтты. Қазір оқиға орнында шұғыл қызмет жасағы мен сала мамандары жұмыс істеп жатыр.
Астана қалалық полиция департаменті бұл факт бойынша қылмыстық іс қозғады.
«18 шілде күні шамамен сағат 20:00-де құрылыс нысанында жұмыстар жүргізу кезінде мұнаралы кран құлады. Кабинада болған ер адам алған жарақаттарынан оқиға орнында қаза тапты. Қазір оқиғаның мән-жайы анықталып жатыр», – делінген департамент мәлімдемесінде.
