Өскемен әуежайының бұрынғы басшысы бес жыл бойы ірі көлемде қаржы жымқырып келген. Бұл туралы Қаржылық мониторинг агенттігінің ШҚО бойынша департаменті хабарлады.
Тергеу деректеріне сүйенсек, әуежайдың экс-президенті мен өзге де лауазымды тұлғалар еңбекақыны заңсыз арттырып, жалған сыйақы мен келісімшарттар арқылы жүйелі түрде ақша иемденген. Қаражат касса арқылы қолма-қол ақшаға айналдырылып, заңсыз жаратылған.
Сонымен қатар, кәсіпорынның көлік құралдары нарық бағасынан әлдеқайда төмен ақшаға сатылып, коммерциялық нысандар арзан бағаға жалға берілгені белгілі болды.
Күдіктілердің бірі – әуежайға 2004-2023 жылдар аралығында басшылық еткен Николай Короленко.
Мемлекетке келтірілген шығын 157 млн теңгені құрап отыр. Сотқа дейінгі тергеу аяқталып, күдіктілердің 126 млн теңгеге бағаланған мүлкі тәркіленген. Олар қамауға алынды.
фото: gov.kz
