Қазақстан мұнай өндіру көлемі квотадан асып кеткенімен, мұнайды сыртқа шығарушы елдер келісімінен шығуды жоспарламайды. Бұл туралы Премьер-министр Олжас Бектенов мәлімдеді.
Оның айтуынша, Теңіз кен орнында жүзеге асып жатқан кеңейту жобасына байланысты еліміздің өз міндеттемелерін толық орындауы уақытша қиындаған. Аталмыш жоба биыл бастау алды.
«Біз Теңіздегі серіктестерден өндіріс көлемін азайтуды талап ете алмаймыз. Себебі олар жобаның кеңеюіне 49 млрд доллар инвестиция салды, демек табыс табуды көздеп, инвестицияларының қайтарымын күтеді», – деді Бектенов.
Сонымен қатар, ол ОПЕК+ шеңберінде әріптестерін алдын ала хабардар еткенін айтып, келісімнен шығу мәселесі мүлде қарастырылмайтынын нақтылады.
«Бұл келісім нарықтағы тұрақтылықты қамтамасыз етеді, сондықтан біз міндеттемелерімізді ұлттық мүддені ескере отырып орындауға тырысамыз», – деп жауап берді Үкімет басшысы.
фото: freepic.com
