Қазақстанда графикалық процессорларға негізделген жаңа суперкомпьютер іске қосылды. Бұл – Alemcloud Ұлттық суперкомпьютерлік орталығы мен халықаралық серіктестердің бірлескенжобасы.
Суперкомпьютер NVIDIA H200 чиптері негізінде жұмыс істейді және FP8 форматындағы есептеу жылдамдығы бойынша 2 экзафлопс өнімділікке дейін жетуге қауқарлы. Жүйе цифрландыруды ілгерілетуге мүмкіндік беретін маңызды қадам ретінде қарастырылып отыр.
Бұған дейін Presight (G42) компаниясының Астанадағы кеңсесінің ашылуы аясында Қазақстан Үкіметі мен халықаралық серіктестер арасында суперкомпьютерлік кластер құру жөнінде келісім жасалған болатын. 19 мамырда NVIDIA чиптерімен жабдықталған бұл жүйе елімізге жеткізілді.
Суперкомпьютер бір секундта 2 квинтиллион есептеу орындай алады. Цифрлық даму, инновациялар және аэроғарыш өнеркәсібі министрі Жаслан Мәдиевтің айтуынша, осыншама есепті әлемдегі 8 миллиард адам бірігіп шешуге кіріссе, оған төрт күннен астам уақыт кетер еді. Ал Қазақстанның жаңа суперкомпьютері бұл есептеулерді небәрі 1 секунд ішінде орындай алады.
Рейтинг бойынша әлемдегі ең көп суперкомпьютері бар ел – АҚШ (175 жүйе), одан кейін Қытай (47) мен Германия (үшінші орын). Бұл елдер жоғары өнімді есептеу жүйелерін ғылым, қорғаныс, медицина және технологиялық зерттеулер үшін кеңінен пайдаланады.
