Батыс Қазақстан облысында шекара аймағында орналасқан аудандардағы 13 мектеп оқушы санының аздығына байланысты жабылып қалуы мүмкін. Бұл мәселе бойынша мәжіліс депутаттарының сауалына премьер-министрдің орынбасары Ерлан Көшербаев жауап берді.
Вице-премьердің мәлімдеуінше, білім беру ұйымдарының жұмысы мемлекеттік нормативтерге сай реттеледі. Яки ауылдық елді мекендерде бастауыш мектепте – кемінде 5, негізгі мектепте – 41, ал жалпы орта мектепте – 81 және одан да көп оқушы болған жағдайда аталған білім мекемелерінің жұмыс істеуіне заңнамалық кепілдік беріледі.
«Бұл мектептердегі оқушы саны белгіленген нормадан әлдеқайда төмен болғандықтан, 2025-2026 оқу жылында орта мектеп негізгі мектепке, ал негізгі мектеп бастауышқа айналуы немесе толықтай жабылуы мүмкін. Осыған байланысты Оқу-ағарту министрлігі БҚО әкімдігіне шекара маңындағы ауыл мектептерін сақтау және дамыту жөнінде ұсыныс хат жолдады. Қазіргі уақытта министрлік шекаралық аймақта орналасқан мектептерді білім беру ұйымдарының жалпы нормативтік тізбесінен алып тастау мүмкіндігін де қарастырып жатыр», – делінген ресми жауапта.
11 маусымда өткен Мәжілістің жалпы отырысында депутат Нартай Сәрсенғалиев мектептер жабылған жағдайда жас балалар өзге ауылдар мен аудандарға барып оқуға мәжбүр болатынын атап өтті. Оның айтуынша, бұл балалардың қауіпсіздігіне күмән тудырады. Сонымен қатар жабылған мектептердің мұғалімдері де қиын жағдайда қалуы мүмкін.
«Тәуелсіздік алғалы бері құжаттың үстіне құжат қабылдаған мемлекеттік органдарда жалқының мысалын жалпыға жабу бар. Әрине, қағаз бәрін көтереді, бірақ қағазға түскен қаріптер халықтың жағдайын қиындатпауы тиіс. Адамы көшкен ауылдың картадан өшетіні белгілі. Бүгінгідей бұйрықтың бұйдасымен кете берсек, бұл сан көбейетіні анық. Сондықтан бір стандартты бәріне бірдей таңу қате. Ендеше аталған нормативтерді қайта қарайтын кез келді», – деді Нартай Аралбайұлы.
Депутат Қазақстан Республикасының «Халықтың тығыздығына және елді-мекендердің қашықтығына қарай білім беру ұйымдары желісінің кепілдік берілген мемлекеттік нормативін бекіту туралы» бұйрығында көрсетілген 2.2., 2.3., 2.4. тармақтарын «ерекше жағдайда» деген тіркеспен толықтыруды немесе шекара маңында орналасқан мектептер үшін аталмыш тармақтарда белгіленген нормативтердің шегін азайтуды ұсынды.
Ауылдық жерлерде халық санының азаюына байланысты кейбір мектепте оқушы саны жеткіліксіз болып отыр. Мұндай жағдайда мектептерді жабу емес, оларды шағын жинақты мектеп ретінде ұйымдастыру қарастырылады.
Ресми мәліметтерге сәйкес, кейінгі 10 жылда елімізде 582 ауыл жойылған. Қазіргі таңда елдегі ауылдардың жалпы саны – 6208. Ауыл тұрғындарының саны, шамамен, 7 миллион адам.
фотоколлаж: Д. Ғұмар
