Британия билігі қазақстандық фирмаларға санкция салынған ресейлік компаниялармен жұмыс істемеу керек екенін ескертті. Санкциядан айналып өтудің салдары ауыр болмақ.
Бұл құжат нұсқаулық ретінде жазылған. Қара тізімге енетін компаниялардың жағдайы нашарлауы мүмкін.
«Санкцияларды айналып өту әрекеттері (мысалы, үшінші елдерде кейіннен қайта экспорттау арқылы сатып алу арқылы) активтерді бұғаттауға, банктік және логистикалық қызметтерді көрсетуден бас тартуға, тіпті қылмыстық жауапкершілікке әкелуі мүмкін», — делінген нұсқаулықта.
Елдегі фирмалар мына ережелерді ескеруі керек:
- Қара тізімге енген кәсіпорындармен іскерлік байланыс орнатпау;
- Санкцияланған тауарларды Англияға импорттауға көмектеспеу;
- Британиядан шыққан тауарларды Ресейге тасымалдамау.
Қазақстандағы банктер де санкция құрығына іліккен тұтынушыларға қызмет көрсетпеуі тиіс.
Қазақстан неге алпауыт елдердің көз қырына ілікті?
Еуропа одағы Ресейге қарсы 18-санкция пакетін әзірлеп жатыр. ҚазТАГ сұрағына жауап берген Еуроодақтың санкциялар жөніндегі арнайы өкілі Дэвид О’Салливан РФ-ны экономикалық қыспаққа алу жалғасатынын айтқан.
«Біздің компаниялар соңғы пайдаланушының кім екенін және ұрыс даласында қолданылуы мүмкін өнімдердің түптің түбінде қайда жеткізілгенін түсіну үшін кешенді түрде тексеру жүргізуге міндетті. Санкциядан айналып өтуді толық болдырмай тастау мүмкін емес. Менің жұмысым – Ресейдің біздің технологияны меңгеруін қиындату, баяулату және қымбаттату», — деді О’Салливан.
Еуроодақтың 17-санкция пакеті Ресейдің экспорты мен импортының 60%-ын қамтыған.
Геосаяси тұрғыда Қазақстан Ресей импортына тәуелді ел. Оған қоса осы елге экспорттайтын дүниесі де мол.
АҚШ та Қазақстанда санкция талабына селсоқ қарайтын кәсіпорындарды анықтайтын арнайы топ құруға ниетті.
«Байден әкімшілігі белгілі бір фирманы немесе ұйымды қара тізімге енгізумен шектелді, ал Трамп – ешкім күтпеген қатаң шешімдер қабылдайтын адам. Сондықтан Ресеймен экономикалық сауда-саттық кезінде Қазақстан аса сақ болуы тиіс», — деген еді Дос Көшім sarapshy.info сауалына.
2019 жылы Ресей Федерациясы үшінші елдерге халықаралық автомобиль және теміржол тасымалын жүзеге асыру кезінде санкциялық тауарлардың транзитіне рұқсат берген.
Одан кейін АҚШ пен Еуропа одағы санкцияны күшейтті.
Санкция салынған компаниялар
Ұлыбритания бұған дейін бірнеше қазақстандық компанияға санкция салды.
Олар мыналар:
- «TawKZ» ЖШС – өнеркәсіпке қажет құрал-жабдықтарға шығарумен айналысады.
- «Рабадазия» ЖШС – көтерме саудамен айналысады, оның иесі – шетелдік азамат.
- Stanex Group компаниясы – өнеркәсіпке қажет жабдықтарды, құрылыс материалдарын жеткізумен айналысады.
- CPS Energy — муниципалды электр компаниясы.
- «Запчасть-Трейд» компаниясы – автомобильдерге арналған бөлшектер мен жинақтаушы бөлшектерді сатумен айналысатын ірі сауда ұйымы.
- «Kazstanex» ЖШС әртүрлі тауарларды сатумен айналысатын ірі сауда ұйымы. Сондай-ақ бұған АҚШ Қаржы министрлігі де санкция салған. Тізімге 17 елден 275 адам мен компания қосылған. Нәтижесінде Қытай арқылы Ресейге станоктар жеткізді деп Kazstanex айыпталған.
2024 жылы АҚШ Kazstanex пен Catu Tech Ltd.компанияларына және «КБР-Технология» ЖШС-на айыппұл салды.
фото: Depositphotos.com
