Қазақстанда алғашқы атом электр станциясы он жылдан кейін пайдалануға беріледі. Бұл жөнінде ҚР Атом энергиясы жөніндегі агенттігі хабарлады.
Росатом АЭС құрылысын 10-12 жыл жүргізеді. Ресей тарапы жеңілдікпен құрылыс материалдарын экспорттайды. Агенттік дерегі бойынша тариф құны жылу-электр орталығы өндіретін электр қуатының бағасынан жоғары болады. Аталған мекеме станция 2035-2036 жылдардың шамасында іске қосылады деген ақпарат таратты.
Қазақстанның Атом энергиясы жөніндегі агенттігі 14 маусым күні АЭС салатын консорциум көшбасшысы Росатом болатынын мәлімдеді. Талдау нәтижесі агенттік пен «Қазақстандық атом электр станциялары» ЖШС және француздық Assystem инженерлік компаниясы бірлесіп әзірлеген әдістеме негізінде белгілі болды.
Екінші станцияны қытай компаниясы – China National Nuclear Corporation салады. Одан кейін Électricité de France мен Korea Hydro & Nuclear Power компаниялары тізімде тұр.
Атом энергетикасы агенттігінің төрағасы Алмасадам Сәтқалиев Қытай мен Ресей жобалары мықты деп мойындалғанын айтты. АЭС салуда Росатомның жетекшілік етуіне рұқсат берілуін кейбір сарапшылар мен саясаткерлер сынады. Қоғам белсенділері санкция құрсауында қалған Ресейдің АЭС құрылысын уақтылы әрі сапалы жүргізетініне күмәнмен қарайды.
фото: pixabay
