2024 жылы аса қауіпті 19 ұйымдасқан қылмыстық топ ұсталды. Бұл туралы Ұлттық қауіпсіздік комитеті хабарлады.
- Ауыр және аса ауыр қылмыс жасағаны үшін 72 адам, оның ішінде топ басшылары мен белсенді мүшелері қылмыстық жауапкершілікке тартылды.
- Жалпы 98 күдікті ұсталды. Олар кісі өлтіру, тонау, бопсалау сияқты ауыр қылмыстар жасады деп айыпталуда. Олардың ішінде шетелдік қылмыстық топтарға қатысы бар адамдар да бар.
- 40 адам сотталды, қалғандарына қатысты тергеу жұмыстары жалғасып жатыр.
ҰҚК төрағасы Ермек Сағымбаевтың мәліметінше, 2024 жылы 4 террористік акт тоқтатылып, 84 адам сотталған, 44 адам ұсталған. Сирия мен Түркиядан 6 қазақстандық экстрадицияланып, олардың екеуі сотталды. Терроризм мен экстремизмге қатысы бар 824 шетел азаматының Қазақстанға кіруіне жол берілмеді.
1,6 триллион теңге көлемінде экономикалық залал келтіру деректері әшкереленіп, 315 миллиард теңге бюджетке қайтарылды, сыбайлас жемқорлық бойынша 46 адам сотталды.
Ішкі істер министрлігі терроризм актісі туралы жалған хабарлама беру деректері бойынша 2024 жылғы мәліметтерді жариялады. Жыл басынан бері мұндай 168 қылмыстық іс қозғалып, 31 адам ұсталды, оның ішінде 12-сі – кәмелетке толмаған балалар. 13 адам сотталды, олардың екеуі – жасөспірімдер. Сонымен қатар алты ата-анаға баласына тәрбие беру бойынша міндетін орындамағаны үшін айыппұл салынды.
Сурет: ҚР Ұлттық қауіпсіздік комитеті
