Жыл сайын елімізде 10 мыңнан астам өрт шығып, 300-ден астам адам қаза табады. Өрт көп жағдайда тұрғын үй секторында болады.
ТЖМ Өртке қарсы қызмет комитеті төрағасының орынбасары Қанат Доспаевтың айтуынша, қазан айында жылыту кезеңі басталысымен тұрғын үйлерде 100-ден астам өрт тіркеліп, 17 адам қаза тапқан. Сонымен қатар 13 адам жарақат алды.
«Жыл басынан бері сегіз мың өрт тіркеліп, 213 адам қаза болса, 213 адам жарақат алды», – деді ол.
Сондай-ақ ТЖМ өкілі жылыту маусымындағы негізгі заң бұзушылықтарды атады.
Оның айтуынша, өткен жылыту маусымдарының тәжірибесіне сүйене отырып, профилактикалық жұмыстармен автономды жылыту жүйелерімен байланысты жазатайым оқиғалар қаупі бар тұрғын үйлер қамтылады. Қазірге дейін мамандар 220 мыңнан астам үйді аралап, 580 мыңға жуық адамға нұсқау берілген.
«Тұрғын үй секторында анықталған заң бұзушылықтар бірдей. Бұған тазартылмаған мұржалар, ақауы бар электр желілері және жылыту пештерін айтуға болады», – деді спикер Орталық коммуникациялар қызметі алаңында өткен баспасөз конференциясында.
Сонымен қатар жылыту маусымында халықтың әлеуметтік осал топтарына ерекше назар аударылады. Бұл ретте Қанат Доспаев өрт датчиктерін орнатудың тиімділігін атап өтті.
2016-2024 жылдардағы жылыту кезеңдерінде датчиктер 245 адамның өмірін сақтауға көмектескен. Осы жылдың 1 маусымынан бастап үйлерге сегіз мың өрт датчигі орнатылған.
Төтеншелік ақауы бар пештер, тазартылмаған мұржалар – өрттің жиі кездесетін себептерінің бірі екенін де атап өтті.
«Біз тұрғындарға мұржаларды айына бір рет, жылыту маусымы кезінде үш рет тазалауды ұсынамыз», – деді Қанат Доспаев.
Өрт елдің қай облысында жиі болады?
Өрт оқиғаларының көбеюі Астана, Алматы, Шымкент қалаларында және Алматы мен Маңғыстау облыстарында жиі байқалды.
Сонымен қатар қаза тапқандардың көпшілігі Қарағанды, Ақмола, Солтүстік Қазақстан, Шығыс Қазақстан, Алматы, Атырау және Қостанай облыстарында тіркелген. Өрт кезінде 64 адамның мас күйде болғаны анықталды.
Сурет: pixabay.com