Д. Серікбаев атындағы Шығыс Қазақстан техникалық университетінің иелігіне «Алтай» технопаркі» ЖШС қайтарылды. Бұл жөнінде Қаржы мониторингі агенттігі хабарлады.
ҚМА-ның облыстық департаменті тергеу жүргізіп, аталған ЖШС-ның жарғылық каптиалындағы 78% үлестің заңсыз жолмен жекеменшікке берілгенін анықтады.
«2018–2020 жылдары университеттің бұрынғы басшылығы «Технопарк «Алтай» ЖШС-нің жарғылық капиталындағы 78% мемлекеттік мажоритарлық үлесті заңсыз түрде жекеменшікке өткізген. Мемлекет басшысының заңсыз шығарылған активтерді қайтару жөніндегі тапсырмасын орындау аясында университетке жалпы құны 1,5 млрд теңге болатын «Технопарк «Алтай» ЖШС-дегі 100% үлес, 8 мың шаршы метрлік ғимарат пен 1,3 га жер телімі қайтарылды», — деп мәлімдеді агенттік.
Универистет сайтындағы дерек бойынша Өскемен құрылыс-жол институты 1958 жылы ашылған. 1996 жылы Шығыс Қазақстан техникалық университеті ретінде тіркелді. 2020 жылы республикалық мемлекеттік кәсіпорнынан коммерциялық емес акционерлік қоғамына айналды.
ШҚТУ металлургия, машина жасау, энергетика, медициналық техника және басқа да салалар үшін мамандар даярлаумен айналысады. КЕАҚ құрамында 17 ғылыми орталық, зертхана және ғылыми-өндірістік алаң бар.
Д. Серікбаев атындағы Шығыс Қазақстан техникалық университетін 2015-2022 жылдары биология ғылымының докторы, профессор Жасұлан Шаймарданов басқарған. Шаймарданов оған дейін ҚР Білім және ғылым министрлігі жоғары, жоғары оқу орнынан кейінгі білім және халықаралық ынтымақтастық департаменті, Білім және ғылым саласындағы бақылау комитетінің Павлодар облысы бойынша білім беру саласындағы бақылау департаменті, аталған министрліктің жоғары және жоғары оқу орнынан кейінгі білім департаментінің директоры қызметін атқарды.
