Орал қалалық соты 2019-2020 жылдар аралығында «Качество PLUS» ЖШС қаржылық (инвестициялық) пирамидасын құрған Орал қаласының тұрғынын анықтады.
Бас прокуратура мәлім еткендей, инвестициялық жобаларды заңды түрде инвестициялаймыз деген желеумен ол 73 салымшының қаражатын заңсыз тартып, жоғары табысқа уәде берген.
«Аталған тұрғынның қылмыстық әрекетінің нәтижесінде жәбірленушілер жалпы сомасы 143 миллион теңгеден астам материалдық шығынға ұшыраған. Сонымен қатар ол «Свой DOM.kz» азаматтардың тұтыну кооперативі және «Pater Hause» тұрғын үй-құрылыс кооперативінен жалпы сомасы 161 миллион теңгеден астам қаражатты ұрлаған», – деп мәлімдеді прокуратураның баспасөз қызметі.
Мемлекеттік айыптаушының принципті ұстанымын ескере отырып, сотталушының қаржылық пирамиданы құруға және басқаруға, сондай-ақ қаражатты ұрлауға қатыстылығы дәлелденді.
Сот сотталушыны кінәлі деп тауып, қаржы ұйымдарында басшылық лауазымды атқару және он жыл мерзімге қаржы ұйымының мүшесі болу құқығын шектеді. Оны жеті жылға бас бостандығынан айырды. Сот үкімі заңды күшіне енген жоқ.
БҚО экономикалық тергеп-тексеру департаменті соңғы үш жылда ҚР ҚК-ның 217-бабымен қаржы пирамидасын құру және оған басшылық ету бойынша 14 деректі анықтаған. Осы пирамидаларға үш мыңнан астам салымшы қатысқан.
Айтып өтелік, Қазақстанда «Қаржы пирамидаларына қарсы іс-қимыл» арнайы жобасы іске қосылды.
Қаржылық мониторинг агенттігінің соңғы мәліметтеріне сүйенсек, елімізде интернет желісінде 43 қаржы пирамидасы анықталған.
Мамандар пирамида құрбандарының дені – тұрғындар, табысы төмен, білім беру, денсаулық сақтау салаларында жұмыс істейтіндер, зейнеткерлер және халықтың өзге де әлеуметтік осал топтары екендігін айтады.
Сурет: freepik.com