Өскемен қаласының №2 сотында ШҚО экология департаментінің басшысы Данияр Әлиевке қатысты қылмыстық іс қаралды. Ол пара алғаны үшін айыпталды.
Ratel.kz мәліметінше, айыпталушылар қатарында «Frucom» ЖШС директоры Константин Длужевский мен пара беру делдалдығы бойынша кінәлі деп танылған жергілікті тұрғын Максат Жұрқабаев та бар.
Тергеу барысында Жұрқабаев Длужевскийден 10 миллион теңге алып, оны Әлиевке беруі тиіс болған. Алайда, облыстың бас экологы делдал арқылы тек 5 миллион теңге алған.
Сот Данияр Әлиевті кінәлі деп танып, оны мемлекеттік қызметте лауазымдық қызмет атқару құқығынан өмір бойына айырып, 4 жылға соттады.
Константин Длужевский қымбат металдар мен қымбат тастарды барлау және өндірумен айналысатын компанияларда басшылық қызмет атқару құқығынан 5 жылға айырылды. Сондай-ақ сот оны мемлекеттік қызметте жұмыс істеу құқығынан және 4 жылға бас бостандығынан айырды.
Максат Жұрқабаев 1,5 жылға бас бостандығынан айырылды.
Сонымен қатар, сот ШҚО прокурорына қатысты жеке ұйғарым шығарды. Прокурор параның қалған сомасының қайда кеткенін анықтауы тиіс.
Еске салсақ, Данияр Әлиевтің ұсталғаны туралы 2023 жылдың желтоқсанында белгілі болды. Ал қараша айында оның орынбасары Рауан Тұраровқа қатысты сотқа дейінгі тергеу жүргізіліп жатқаны хабарланған еді.
2024 жылдың шілдесінде Антикор қызметкерлері ШҚО экология департаменті басшысының міндетін атқарушы Мама Бутабаевты 10 миллион теңге пара алған кезінде ұстаған болатын.
Cурет: YK-news.kz
