Алтынның бағасы 2025 жылдың желтоқсанына қарай бір унция үшін 3 мың долларға жетеді, деп жазды Bloomberg Goldman Sachs агенттігіне сілтеме жасап.
Баға динамикасына қандай факторлар ықпал етеді?
Сондықтан инвестициялық банк нарық қатысушыларын алтынды көптеп сатып алуға шақырды. Сарапшылар бұған Дональд Трамптың президенттігі кезіндегі митингтердің жалғасуы, Орталық банктер тарапынан сұранысының артуы және АҚШ -тағы ақша-несие саясатының жеңілдеуіне байланысты биржалық қорларға қаражаттың түсуі ықпал ететінін айтады. Тағы бір фактор жаһандық саудадағы шиеленістің күшеюі де әсер етуі мүмкін.
«Вашингтон мен Бейжің арасындағы сауда шиеленістерінің күшеюі алтынға қызығушылықтың артуына әкелуі мүмкін. АҚШ-тың өсіп келе жатқан қарыз ауыртпалығына қатысты алаңдаушылық бағалы металдар бағасын да қымбаттатты. Орталық банктер, әсіресе АҚШ-тың мемлекеттік облигацияларында резервтерінің маңызды бөлігін алтынмен ұстайтын банктер қорларын көбейтеді», – деп хабарлайды Goldman Sachs.
Баға құбылды
Алтынның спот және фьючерстердің бағасы 30 қазанда АҚШ-тағы саяси белгісіздік факторына байланысты бірінші рет 2,8 мың доллардан асып түсті. Бұл ретте споттық баға деп отырғанымыз – құнды металдың нақты тіркелген эталондық құны. Ол әдетте күніне екі рет белгіленеді және ішінара алтын спот нарығында болып жатқан жағдайға және ішінара фьючерстік нарықтағы сауда белсенділігіне негізделген.
Ал алтын фьючерстері – халықаралық қор биржаларында сатылатын құнды металл келісімшарттарының құны. Металдың фьючерстік бағасын әлем бойынша миллиондаған трейдерлер бақылайды. Сол арқылы ол нарықтағы динамиканы болжайды.
18 қарашада Comex тауар биржасында (Нью-Йорк тауар биржасының бөлімшесі) алтын фьючерстері 1%-ға өсіп, бір унция үшін 2 597,5 долларды құрады. Споттық алтын құны 1,25%-ға өсіп, бір унция үшін 2 593,4 долларға жетті. Сарапшылар 2025 жылы баға бір унцияға 3 мың долларға жетеді деп болжап отыр.
Трамптың жеңісі құнды металл нарығына да әсер етті
Deutsche Bank-тің мәліметтері бойынша Трамптың АҚШ-тағы президенттік сайлаудағы жеңісінен кейінгі алтын бағасы 7%-ға дейін құлдырады. Бұл 2020 жылдың наурызынан бері ең үлкен төмендеу болды. Айта кететіні, 2024 жылдың басынан бері алтын 30%-дан астам қымбаттаған еді.
АҚШ банкінің инвестициялық стратегия бойынша аға директоры Роб Ховорт метал құнының өзгеруін доллардың нығаюымен және сайлаудағы белгісіздіктің әлсіреуімен байланыстырады.
«Трамп өзінің экономикалық жоспарларын жүзеге асыруды шешсе де, инвесторлар алда не күтіп тұр, қандай жағдайларға дайындалу керегін білмейді. Олар осы тәуекелдерді ескере отырып, биржалық стратегиялар жасайды. Нәтижесінде Трамп жеңісінен кейін алтынға деген қызығушылық төмендеді», – деп хабарлады Роб Ховорт.
Нарық қалпына келе бастады
Дүниежүзілік алтын кеңесінің дерегіне сүйенсек, бағалы металға жалпы сұраныс, оның ішінде биржадан тыс инвестицияларды қоса алғанда, шілде-қыркүйек айларында өткен жылдың сәйкес кезеңімен салыстырғанда 5%-ға өсіп, үшінші тоқсандағы рекордтық көрсеткішке жетіп, 1313 тоннаны құрады. Динамикаға алтынның ETF-та (биржалық балама) сатылуы ықпал етті (95 тонна).
«АҚШ Орталық банкінің алтын сатып алу қарқыны өткен тоқсанда (186 тонна) баяулады, бірақ соңғы төрт тоқсандағы таза сатып алу 909 тоннаны құрады. Бұл көпжылдық орташа көрсеткіштен айтарлықтай жоғары», – деп хабарлады Дүниежүзілік алтын кеңесі.
Алтынға инвестиция салған дұрыс па?
«DAMU Capital Management» ЖШС-ның бас директоры Мұрат Қастаев алтынға деген сенім ғасырлар бойы қалыптасқанын айтады. Алайда ол құнды металл мен оған байланған инвестициялық құралдарға бос қаражаттың тек 5-10%-дан аспайтын бөлігін ғана салу керек деп есептейді.
«Инвестициялық портфельде әртүрлі құралдар болуы шарт. Мәселен, депозиттер, құнды қағаздар, оның ішінде акция және облигациялар бар. Бұған қоса жылжымайтын мүлікті айтуға болады. Сондай-ақ бір бөлігін алтынмен ұстауға болады. Яғни инвестициялық құралдар әр түрлі болуы керек. Тек сонда ғана қаражат азаймай, еселенуіне сенімді болуға болады. Себебі нарықта тәуекелдер жоғары. Инвестициялық портфельді әртараптандыру арқылы сақ болу керек», – деп кеңес берді экономист.
Сурет: foreximf.com