Орал қаласындағы №28 қатаң режимдегі түзету мекемесінде сотталғандар колония қызметкерлерінің зорлық-зомбылық көрсеткенін айтып, бейнежазба таратты. Осы оқиға бойынша БҚО қылмыстық-атқару жүйесі департаменті тергеу жұмысы басталғанын растады.
Жәбірленушілердің айтуынша, мекеме қызметкерлері оларды суицидке итермелеген. Видеода колониядағы азаптау, қатыгездік және камера ішіндегі жағдай туралы баяндаған.
Сотталғандардың сөзінше, екі адамға арналған камераларда бес тұтқыннан отыр. Колонияда жазасын өтеп жатқандар антисанитариялық жағдайға байланысты колония басшылығына бірнеше рет шағымдан. Бірақ мекеме басшылығы ешқандай шара қолданбаған.
Әлеуметтік желілерде таралған бейнежазбада өзін сотталушымын деп таныстырған ер адам камерада өздері арандатушылық әрекеттер болатынын айтады.
«№28 мекеменің әкімшілігі сотталғандарды үнемі арандатуға тырысады. Біздің жазған шағымдарымыз бен өтініштеріміз ескерусіз қалады. Жағдайыма назар аударту үшін өзіме қол жұмсауға дейін бардым, қолымды кестім. Себебі санитарлық бөлімге қатысты да шағымым бар. Мен онкологиялық науқаспын, бірақ шағымдарым ешқайда жетпейді. Полиция мүлдем әрекетсіз», — дейді ол.
Мұндай әрекетке шарасыздықтан барғанын айтып, көмек сұрайды.
БҚО қылмыстық-атқару жүйесі департаменті жазасын өтеушілер денесін жарақттағанын хабарлады.
«Батыс Қазақстан облысының № 28 мекемесінде сотталғандар ұстау режиміне наразылық ретінде өздеріне шамалы дене жарақатын салды. Медициналық көмек көрсетілді. Ауруханаға жатқызудың қажеті жоқ», — деп хабарлады департаменттің баспасөз қызметі.
Департамент шағымданғандардың өзі қасақана тәртіп бұзды деп мәлімдеді. Колонияда ауыр қылмыс жасағандар жазасын өтеп жатыр. Аталған дерек бойынша қызметтік тексеру басталады.
2023 жылдың қыркүйек айында әлеуметтік желілерде Ақмола облысы Атбасар қаласындағы №1 түзеу мекемесінде жазасын өтеушілердің азапталғаны туралы бейнежазбалар тарады. Бейнежазбаларда түрме қызметкерлерінің сотталғандарды ұрып-соғып жатқаны көрінеді. Осы оқиғадан кейін 12 түрме қызметкеріне қатысты «азаптау» бабы бойынша қылмыстық іс қозғалып, сот процесі басталды. 2025 жылдың 12 ақпанында Ақмола облысының қылмыстық істер жөніндегі мамандандырылған ауданаралық соты алқабилердің шешімімен аталған 12 қызметкерді ақтау туралы үкім шығарды. Алайда, 14 ақпанда облыстық прокуратура бұл үкіммен келіспей, апелляциялық шағым түсірді.
Былтыр тамыз айында Оралдағы колонияда жазасын өтеушілердің бірі өзіне қол жұмсаған болатын.
Сурет: Мой Город
